ANQARA - Çalakîya rojeyê mergî yê Sîbel Balaçe 269 rojî yo dewam kena.  Sîbela ke seba muhakemeyêkê adilane dest bi çalakî kerdibî, vejîya 39 kîloyan. 

Sîbel Balaç 29ê kanûna 2021ê Zîndanê Cinîyan ê Sîncanî seba "muhakemeyêkê adilane" dest bi çalakîya rojeyê mergî kerd. Avûkata ci Ceren Yilmaze 6ê êlule de îtîraz kerd û 7ê Êlule de Sîbele sewqê Nêweşxaneyê Cigêrayîş û Perwerdeyî yê Yildirim Beyazitî ê Dişkapi yê Anqarayî kerd. Sîbela ke seba cigêrayîşî wedarnayî nêweşxaneyî vejîya 39 kîloyan. 

 

Buroyê Huqûqî yê Şarî, derheqê rewşa Sîbele de eşkerayîyêke nuşteyî weşan kerd.

 

Eşkerayî de wina ame vatiş:

 

"Sîbele mîyanê şertê nêpak de ciwîyena. Nika Sîbele nêweşxaneyê koguşê tepişteyan de manena. Oda bêhawa ya, boya tuwaletî yena û hucreyêke pak nêya.

 

Rewşa Sîbele seba ke baş nêya, ma seba sewkî muracatê Sazgehê Edlî yê Tibî (ATK) kerd û ma waşt ke bêro veradayîş. La dimayê ke Sîbele berdî nêweşxaneyî kîloyê aye vejîya 39ine. Roja 6ê êlule ra xeylêk tehlîlê ci ameyî kerdiş. Seba nê sebebî xeylêk betilya û tewr zêde kîlo daya. Hem linga xo û hem zî çaqê xo hîsnêkena û mîyanê fekê aye de zî birînî vejîyayî. Goreyê agahiyê ke tewr peyîn ma girewtê, ma tehlîlê ke girewtî do roja çarşeme yan ewro bi peynî bibo.

 

Rewşa Sîbele her roja ke derbaz bena, kewena tehluke û bi nê rengî nêeşkenê zîndan de bimanê. Ganî nêweşxaneyê cigêrayîşî lezabeze raporê xo eşkera bikero. Ganî sewqê ATKyî bêro kerdiş.