Sema Çaglak

 

ŞIRNEX - Dayîkê tepişteyan dîyar kerdî ke tepişteyê sîyasî bi caardişê 12ê Êlule dir rî bi rî yê û wina vatî: “Hemverê tepişteyan de bi hawayê kêfî têgêrenê û binê tecrîdî de yenê verdayîş. Tepişteyê zî pêro heqanê xo ra bêpar ameyê veradayîş.”

 

Zîndanan de binpaykerdişê heqan ê hemverê tepişteyan dewam keno. Tepişteyê nêweşî nênê tedawîkerdiş û înfazê xeylêk tepişteyan yeno veşnayîş. Sewbîna merdişê bi guman ê zîndanan ke roj bi roje zêde benê û tecrîdê serê tepişteyan de keyeyanê înan keno qesawet. Keyeyê tepişteyan ke reaksîyon vera rewşa zîndanan dayî, venga hîsgêrî rayaumûmî rê kerdî.  Keyeyan vat, ganî her kes wayîrê wijdanî bibo û bibo vengê tepişteyan.

 

Nurullah Acet (23) serra 2016ine de ameyo tepiştiş û nika zîndanê Wanî de yeno tepiştiş. Nurullahî rê 2 cezayê muebetî giranî ameyî birnayîş. Dayîka Nurullah Gulsum Acete (51), dîyar kerd ke lajê aye bi serran o hucreyê yewkesî de yeno tepiştiş û vat: “Hemverê tepişteyan de bi hawayê kêfî têgêrenê û tepişteyî binê tecrîdî de yenê verdayîş. Heme heqanê xo ra bêpar yenê verdayîş. Yeno vatiş ke heta 10 serran do yew hucre de bêro tepiştiş. Seba ke îmkanê ma çin ê, ma nêeşkenê ey bivînê. Tewr peyîn ma par ey dîbi. Tutê ma destê înan de yê, ê çi biwazê ê çî kenê. Coka tutê ma bi îşkenceyî reyde rî bi rî manenê. Nika zî vanê tepişteyî xo kişenê. La ma bawer nêkenê xo tepişteyî xo bikişê.”

 

‘Hemverê tepişteyan de caardişê 12 Êlule yenê kerdiş’

 

Gulsume, dîyar kerd ke hemverê tepişteyan de muameleye sey yê 12ê Êlule esto û wina vat: “Ma nêwazenê tepişteyan îşkence û teda bikerê. Serranê 12ê Êlule xeylêk xirab bî. Nika zî hemverê tepişteyan de caardişê ê wextî de yenê kerdiş. Kesê ke dizdî kenê, taciz û tecawuz kenê serbest veradanê la ê sîyasîyan vera nêdanê. Tutê m abi serran ê bêsuc zîndanan de esîr yenê girewtiş. Tutê ma tena dewaya  heqê xo kerdê. Ma wazenê seba pêro tepişteyê sîyasî efûyêkê vejê. Ganî ma seba tepişteyanê xo têkoşîn bikerê û xo ver bide. Ma do bibê vengê tepişteyan. Bêvengî çare nêya. Her çiqas kurdan bikerê zîndanan yan zî bikişê zî nêeşkenê înan biqedênê.”

 

‘Ma do bibê vengê tepişteyan’

 

Alî Gerden(29) zî serra 2016ine de ameyo tepiştiş û nika zîndanê Xarpêtî ya tîpê Fyî de tepişte yo. Alîyî rê 61 serrî ceza ameya birnayîş. Dayîka Alî, Fatma Gerden (60) da zanayîş ke lajê aye eynî demî de yew tepişteyo nêweş o û vat: “Îmkanê ma seba pêvînayîşî çin o. Ez hem nêweş a, hem zî şert û mercê ma çin ê. Lajê mi surgunê xeylêk cayan ameyo kerdiş û nika Xarpêt de yo. Seba ke bîyarê bajarêkê nêzdîyê ma xeylêk waştişname şawitî la pêwa nê serdayîşê ma, pêro bêcewab mendî. Xeylêk reyî erzîyeno serê qawîşê înan de yeno girewtiş û gardîyanî teda înan rê kenê. Emrê tutanê ma zîndanan de derbaz beno. Lajê mi hema tut bi ame tepiştiş û nika 61 serrî ceza ci rê ameye birnayîş. Wa êdî tutanê ma vera bidê. Tena keyeyî ney, ganî heme kesê wayîrê wîjdanî û yê ke heqê merdiman pawenê, bibê vengê tepişteyan.”