ŞIRNEX - Rêxistina HDPyî ya qezaya Cizîrî bi minasebetê akerdişê mekteban de eşkerayîyêke da û dîyar kerd ke bi mîlyonan tutê kurdî heqê xo yê perwerdeyê bi ziwanê xo bêpar yenê verdayîş. Sewbîna eşkerayî de ame dîyarkerdiş ke heta ziwanê kurdkî bibo ziwanê perwredeyî do têkoşînê înan dewam bikero.

 

Rêxistinê Partîya Demokratîke ya Şaran (HDP) ya qezaya Cizîrî de bi minasebetê akerdişê mekteban, seba ziwanê kurdkî bibo ziwanê perwerdeyî verê bînaya xo ya qeza de eşkerayî da. Komeleya Kulturî ya Birca Belekî, Rêxistinê merkez û qezayan ê HDPyî yê Şirnexî, Tevgerê Cinîyan ê Azadan (TJA), Partîya Herema Demokratîke (DBP), Şaredarîya HDPyî ya Silopî, Endamê Meclîsê Dayîkê Aştîye, MEBYA-DER û Parlementerê HDPyî yê Şirnexî Hasan Ozguneş tewrê eşkerayîye bî. Eşkerayî de pankartê “Wa ziwanê kurdkî bibo ziwanê fermî” ame akerdiş û dovîzê “Ziwanê ma rûmetê ma yo” , “Nameyê mi xozaye ya”, “Hêvî serkewtişî ra erjayeyêr a” û “Heqîqet eşq o, eşq cuyêka azad o” ame wedaritiş.

 

‘Tutê kurdî heqê perwerdeyê bi ziwanê xo ra bêpar ê’

 

Metnê eşkerayîye hetê Hemsereka HDPyî ya Cizîre Zîlan Ecevîte ra ame wendiş. Zîlane, dîyar kerd ke bi mîlyonan tutê kurdî heqê ziwanê xo ra bêpar yenê verdayîş û vat: “Ewro Tirkîya û vakurê Kurdistanî de, serdemê perwerdeyîyê serranê 2022-2023yan dest pêkeno. Sey 99 serrî yê vîyarte de bi mîlyonan tutê kurdî reyna mektebê ke seba wendekarê kurdî bîyê wareyê asîmîlasyonî, ziwanê kurdî bêpar verdenê.”

 

‘Yeno waştiş ke kurdî komelî ra bêrê visnayîş’

 

Zîlane, dewam de wina vat: “ Dişminîyê hemverê ziwanê kurdkî tena wareyê perwerdeyî de ney, her ware de vejêno werte. Çinhesibnayîş û hewldayîşê werte ra wedaritişî kurdî bi rayîr û metodê cîya dewam kenê. Bi qedexe û astengkerdişê kurdî yê xeylêk hetan ra, dewlete kurdan kena binê ablûqa, krîmînalîze kena û bi xeylêk teda, hêriş û qedexekerdişan sazgehê kurdî yê ke netîceyê têkoşînê şarê Kurdî yê azadîwaştoxan de ameyê sazgehkerdiş, gêno. Wazenê kurdkî komelî ra bivisnê û mîyanê demî de werte ra wedarnê û bi no hewa peynîya kurdkî bîyaro. Bi rayîrê wedaritişê kurdkî stûnê bingehîn ê têkoşînê kurdan ê azadîye werte ra wedarnê û netîce de do şarê Kurdî werte ra wedarnê.”

 

‘Ma do her ca bikerê mekteb’

 

Zîlane tewr peyîn wina vat: “Ma Kurdî baş zanenê ke kurdkî rûmet, bîyayîş û nasnameyê ma ya neteweyî ya. Kurdkî kilîtê azadîya neteweya kurdî a tarîxî ya, komel û polîtîk a. Ke kurdkî çin biba, ma pêro çin benê. Serê nê bingehî de; erebkî, fariskî, tirkî û xeylêk ziwanê bînî wayîrê kam ci heqan bê, ganî kurdî zî wayîrê ê heqan bê. Ganî pêşdibistan ra heta unîversîte kurdkî bibo ziwanê perwerdeyî. Ganî kurdî bibê wayîrê statuyêkê fermî û ma kurdî her ca bikerê mekteb û unîversîteyê kurdkî”

 

Eşkerayîye bi sloganê, "Bê ziwan cuye nêbena" û bi çepikan peynî bî.