Sema Çaglak

 

ŞIRNEX - Cinîyê ke turnuvayê Futbolî de kay kerdî, bale antî serê polîtîkayê şerê xususî û vatî, do kurdî tu wext vîrardiş û tarîxê xo xo vîr ra nêkerê. Sewbîna cinîyan dîyar kerd, do hemverê şerê xususî wareyan de bê.

 

Turnuvayê Futbolî yê Kemal Kurkutî bi sloganê, “Mebê tiryakkêş, azad bê” hetê Şaredarîya Silopî û Meclîsê Ciwanan ê Partîya Demokratîke ya Şaran (HDP) ra ame organîzekerdiş. Mîyanê 83 tîman de 6 ci ra tîmê cinîyan o. Tîmê cinîyan seba vîrardişê cinîyê ke qedexeyê tebervejîyayîşê kuçeyan ê Cizîr û Silopî de amebî qetîlkerdiş, ameyî awankerdiş. Nameyê tîmê cinîyan;  “Cemîle Çagirga” , “Asya Yuksel”, “ Pakîze Nayir”, “Jiyan Spor”,  Şaredariya Silopî” û “Silopî Belediyesî” yo.

 

Cinîyê ke tewrê turnuvayî bî ajansê ma rê qisey kerdî.

 

Meryem Eşkara vat, cinî hemverê metodê cinsperestî vejênê û vat: “Turnuvayê ma yê cinîyan şexsê cinîyê ke qedexeyê Cizîrî û Silopî de ameyê qetilkerdiş, ame organîzekerdiş. Turnva de ma hem vîrardişê cinîyê ke ameyî qetilkerdiş, gane kerd û hem zî rayberîya înan pawit. Ma do bibê layiqê ê cangorîyê xo yê cinîyan ê rayberan. Sewbîna sey cinîyê Şirnexî hemverê formê cisnperest waşt rengê xo ware de bimojnê. Seke yeno zanayîş ke hişmendîyê pederşahî her wareyê cuye de cinîyan kerdo binê ablûqa. Ma do hemverê nê de bi azadkerdişê cinî nê hişmendî berê.”

 

‘Eke cinî biwazê eşkenê pêro çîyan bikerê’

 

Evîn Erdene zî wina vat: “Seba ke mi nê turnuvayî de ca girewto, ez zaf kêfweş a. Xora cinî her wareyê cuye de reng û vindertişê xo mojnenê. La ganî no têkoşîn û xoverdayîşê tewr pîl bibê. Lazim o ke cinî xo rê wayîr vejîyo. Eke cinîyî biwazê, eşkenê her çî bikerê. Ganî cinî her het ra xo aver bero û seba cinîyan paştdayîşî bêro dayîş.”

 

‘Ma do wayîrê vîrardişê cinîyanê rayberan vejîyê’

 

Leyla Tatli zî vat, do Kurdî vîrardiş û tarîxê xo xo vîr ra nêkerê û vat: “Ez kêfweş a ke bi nê turnuva ma ê cinîyanê rayberan vîr bîyarê. Amancê ma yê nê turnuvayî dûrvistişê ciwananê kurdan ê maddeyanê tiryakîyan o. Do ciwanî rayîr nêdê na politikaya lêşin. Coka heta ke ma biresê amancê xo û heta ke serkewtişêk nêvirazyo, ma do têkoşînê xo dewam bikerê.”

 

'Ma do bi rengê xo her ware de bê’

 

Tewr peyîn zî Garîbe Bîlîr zî vat, futbol her wext kayêkê sey ê camêrdan yeno hesibnayîş û wina vat: “Ma zî waşt nê nêzdîbîyayîşî bişikinê.  Tena futbol ney xeylêk beşê sporî estê ke bi ewnîyeyîşê cinsperest ameyê ablûqakerdiş. Ganî cinî vernîya nê de vejîyê û her wareyê sporî de rengê xo nîşan bidê. Tîmê ma zî nameyê xo Pakîze Nayire û Asya Yuksele ra girewt. Ma bi nê waşt wayîrê vîrardişê înan vejîyê.”