COLEMÊRG - Ame neqlkerdiş ke 3 cenazeyê ke yenê îdîakerdişî cenazeyê gerîlayanê HPG û YJA STARî yê, pêwa karûbarê otopsî zî bi zêdeyê mengêke yo teslîmê keyeyanê înan nênê kerdene.

 

Mabêne menga Temmuze û Tebaxe de, mabêne endamê Hêzê Çekdarî yê Artêşa Tirke (TSK) û HPG û YJA-STARî de şer û pêrodayîşê xidarî qewimyayî. Şer û pêrodayîşê ke herême de qewimyayî, artêşa Tirkîya bi heme çekê xo yê giran her rey herême topevaran û gulevaran kerdêne. Xeylêk rey zî operasyonî dayî destpêkerdiş û operaysonê bênetîce vejîyayî de tim adir veradayî dar û daristanê herema Colemêrgî. Sewbîna ame zanayîş ke şer û pêrodayîşê yê roja 4 Tebaxe dest pêkerdî û heta nika 7 endamê HPG û YJA-STARî herêma Colemêrgî de dinyaya xo bedelnayê û wedarnayê Nêweşxaneyê Dewlete ya Colemêrgî. Nê 7 cenazeyan ra 3 cenazeyî nêzdîyê 38 rojî yo teslîmê keyeyanê înan nênê kerdiş.

 

Ame neqlkerdiş ke 7 kesê ke dinyaya xo bedelnayê 3 endamên HPGyî, yew ci ra endama YJA-STARî ya. Ame zanayîş ke netîceyê şer û pêrodayîşê 7 Tebaxe ra heta 13 Tebaxe ke 6 rojan dewam kerd, Geliya Tiyare de yew tera cinî 3 HPGyîjan dinyaya xo bedelnayî. Eynî wextî de roja 9ê Tebaxe ra heta 17 tebaxe dewa Anîtos û Koyê Bûsindî, herêma Melûnan, Suvarê Bêriya û Koyê Berana de netîceyê şer û pêrodayîşê xidarî de yew tera cinî 4 HPGyîjan dinyaya xo bedelnaye.

 

Cenaze dayî morgê ke dolaba qeşayê ci xirab a

 

Netîceyê her di şer û pêrodayîşê xidarî yê herême de 7 cenazeyan seba karûbarê otopsî wedarnayî Nêweşxaneyê Dewlete ya Colemêrgî. Dimayê karûbarê otopsî her 7 cenazeyî dayî morgê nêweşxane. Ame zanayîş ke depoyê morgê nêweşxaneyî zî dolaba qeşayî xirab a û cenazeyan nêcemidnena. Mîyanê hewteyêkê de nê cenazeyî wina ameyî verdayîş û nêzdîyê 4 rojan tu çareserî nêame kerdiş. Welatijê ke şîne doktorî, seba boya cenazeyan nêeşkayîne bikewê mîyanê nêweşxaneyî.

 

Nêweşxaneyî îtîraf kerd ke dolaba qeşayî xira bîya

 

Dimayê hewildayîşê sazgehê komelî, 5b rojan ra dima dolaba qeşayî ameye tamîrkerdiş û nêweşxane ame şûtiş. Netîceyê hewldayîşî de îdarekarê nêweşxaneyî vato, boye seba leşkerê ke operasyonan de tenê lingê ey de ameyo vînayîş, kewto nêweşxane û nê îddîa red kerdo. Dimayê çend hewldayîşê îdarekarî hem dolabe, hem zî seba linganê leşkerî boye kewta nêweşxane la ame dîyarkerdiş ke hema zî boya cenazeyan nêweşxane ra yena.

 

3 cenaze dayî keyeyan yew ci ra goristanê bêkesan de defin kerdî

 

Heto bîn ra ame vînayîş ke şewe de wesayîtê zirxî, nobedarê nêweşxane û polîsê sivîlî verê berê morgî de bi hawayêke awarte asayîş gênê û nêverdenê bêdesturê Serdozgorîya Colemêrgî de kes nezdîyê berê morgî bibo. Ame neqlkerdiş ke mîyanê 7 HPG û YJA-STARîyan de cenazeyê Cumhur Karuman, Zîlan Duman û Ziyadîn Onatî teslîmê keyeyan ameyo kerdiş û cenazyî hetê keyeyan ra Colemêrg û Wan de ameyê definkerdiş. Sewbîna yeno îddîakerdiş ke cenazeya endamêke YJA-STARî zî goristanê bêkesan ê Colemêrgî de ameya definkerdiş.

 

Cenazeyan bi kêfî teslîmê keyeyan nêkenê

 

Ame zanayîş ke nika 3 cenazeyê ke 39 rojî yo morgê Nêweşxaneyê Colemêrgî de yenê vindarnayîş, hema teslîmê keyeyan nêameyê kerdiş. Sewbînaame vatiş,  karûbarê otopsî ameyê kerdiş û zanê keyeyê înan kam ê û bi zanebîyayîş teslîmê keyeyanê înan nênê kerdiş.

 

Heto bîn ra leşkero ke  operasyonan de ameyo kiştiş û tena linge ey ameya vînayîş zî ame zanayîş ke linga ey zî goristanê bêkesan de ameya definkerdiş.