ÎZMÎR - Îdarekara ÎHDya Îzmîrî Ayşenur Kîzaroglu da zanayîş ke şer de merdimî binpaykerdişê heqan yê tewr giran ciwîyenê û vat: “Hemverê konseptê şerî ma hewl danê vengê aştîye bi vengêke xurt berz bikerê."

 

Nobeta Aştîye ya ÎHDyê Îzmîrî her roja îne dest bi çalakîya xo kerd. Çalakîya nobeta ke her aşmî bi temayê cîya yena kerdiş, tema ci ya yewine sey ‘Lazimîyê na cografya bi aştîye esto' ame diyarkerdiş. Îdarekara ÎHDyî Ayşenur Kîzaroglu da zanayîş ke prosesê ke şîdetê hemverê cinîyan û problemê Kurd û multecîyan yenê ciwîyayîş de pawitişê heqî kenê û venga tewrbîyayîşê çalakîya nobete kerd.

 

‘Hemverê bêçareserî waştişê heqî'

 

Ayşenure dîyar kerd ke şer de heqê cuye, weşî û asayîşî bi hawayêkê tewr giran yenê binpaykerdiş û hewl yeno dayîş ke nê binpaykerdişî nêrê vînayîş. Ayşenure nê çî vat: "Ma her roje bi kiştişê cinîyan aya benê. Gumanbarê tecawuz û tacîzî yenê pawitiş, bêceza yenê verdayîş. Hukm serê nameyê serdestan beno hacet û hemkarîya qeyûman azadîya weçînayîşî yeno xespkerdiş. Problemê Kurdî de bêçareserî yeno ferzkerdiş û multecîyî nêeşkenê heqanê xo yê esas zî biwazê. Ma zî seba cuyêka merdimayî bi şîarê aştîye dest bi nobetan kenê.”

 

‘Hemverê şerî berzkerdişê vengê aştîye'

 

Ayşenure dîyar kerd ke her roja îne ya ewilî ya menge bi temayê cîya do çalakî bi ca bêrê û wina qedêna: "Babeta na aşme ‘Lazimîyê na cografya bi aştîye esta.' Hemverê şerî, xespkerdişê heqan ê hemverê senaryoyê konseptê şerî seba ma vengê aştîye hîn zêde berz bikerê, ma xebatan kenê."

 

Ayşenure sewbîna dîyar kerd ke her aşme do babetêke cîya bigîrê dest û seba çalakiya bîne veng da.