Derya Ren

 

AMED - 16 rojnamegerê ke bi 3 mengî yo tepişte yê, derheqê  rewşa înan ê tepiştişî de hîrê îtîraz ameyî kerdiş. Avûkat Resul Temur da zanayîş ke her hîrê îtîrazî zî ameyê redkerdiş û vat, do dosya berê DDByî.

 

Çarçewaya cipersayîşê hetê Serdozgerîya Komare ya Amedî ra ameyî kerdiş de 8ê hezîrane de eştî serê JINNEWSî, Pel û şîrketê Piya û Arî û keyeyê rojnamegeran. Çarçewaya operasyonî de 20 ci ra rojnamegerî 22 kesî 8 rojan destbendkerde mendî û 15ê hezîrane de sewqê Edliyeyê Amedî ameyî kerdiş. Dimayê kar û barê dozgerîye 16 rojnamegerî 16ê hezîrane de ameyî tepiştiş.

 

Mîyan de mudura Xeberan ê Ajansê ma Safîye Alagaşe zî esta, 16 rojnamegerî amebî tepiştiş û dimayê nê avûkatan derheqê rewşa tepiştişê înan de hîrê rey îtîraz kerdibî la her hîrê zî amebî redkerdiş.

 

Avûkat Resul Temur da zanayîş ke muracat kerdê netîceyêk nêgirewtê û dîyar kerd ke do dosya berê Dadgeha Destûra Bingehîne (DDB).

 

‘Heqê pawitişê adîlane yeno astengkerdiş'

 

Resulî da zanayîş ke rojnamegerî hîrê aşmî yo tepişte yê û vat: “Demo ke merdim xo nêresneno dosya, problemê muxatabî û zanebîyayîşî yeno ciwîyayîş. Demo kesêkê bêro destbendkerdiş, bêro tepiştiş yan zî derheq de cipersayîşêkê bibo, seba xo bipawo ganî xo biresno dosya û bivîno. La hîrê mengî yo serê dosya de qerarê sînorkerdişî esto û nêverdenê ma xo biresnê dosya. No zî bêguman heqê pawitişê muhakemeyêkê adîlane asteng keno. Embazê rojnamegerî roja ameyê tepiştiş heta nika bi sûcêkê yenê îstînatkerdiş dir nêameyê rî bi rî. Rojnamegerî seba xeberan,  bername û faliyetê rojnamegerîye ameyî muhakemekerdiş. Cipersayîşî zî serê nê de ame kerdiş."

 

‘Ma do muracatê DDByî bikerê'

 

Resulî dewam de wina vat: “Na aşme muracatê hîrêne ame kerdiş. Qerarê dewamkerdişê tepiştişê înan ame dayîş. Avûkatan hemverê nê de îtîraz kerdî û no îtîraz yew çarçewaya dosya de nêame ercnayîş. Îtîrazî ameyî redkerdiş. Seba nê zî vejêno werte ke mekanîzmayêkê merdimî bi hawayêkê adîlane muracat bikerê çin o. Seba nê zî ma tu muracatê xo netîceyêk nêgînê. Seba nê zî ma do muracatê DDByî bikerê."

 

‘Qerarê dewamkerdişê tepiştişî yeno dayîş'

 

Resulî tewr peyîn wina vat: "Esas de bahaneyê tepiştişê înan no bi. Ma prosesê muhakemekerdişî de nê dir rî bi rî yenê. Seba şahidê werte û nimite de çarçewaya dosya de nêyê, seba ke dosya yan zî rojnamegerî yenê muhakemekerdiş dir têkildar nêyê, teberê dosya de yenê girewtiş. Dadgehe vana hewce bi goşdarkerdişê înan çin o. Bi îfadeyê şahidên werte û nimite de qerarê dewamkerdişê tepiştişî yenê dayîş. No zî rayîr ver bi binpaykerdişê muhakemeyî akerd."