Yara Kendeş

 

KOBANÊ - Îdarekarîya Heyetê Aweya ya Herêma Firatî Xalîse Hec Qadir, derheqê polîtîkayê dewleta tirke ya çarçewaya birnayîşê awe ya serê Herêma Vakur û Rojhelatê Sûrîye de wina vat: "Seba awe bingehê cuye ya, dewleta tirke sey  çekêke hemverê şaran de şuxulnena. Ma hemverê birnayîşê awe de bêveng û bêçare nêmanenê. Ma her tim çareserîyan peyda kenê, ma her tim şarê xo reyde hetkarî vejenê vernî û tu rey zî dewleta tirke nêeşkena bi rayîrê şerî serê îradeyê şaran û xebatanê ma sist bikero."

 

27ê Çeleyê derbazbîyaye de dewleta tirke dayeyê awa çemê Firatî serê Vakur û Rojhelatê Sûrîye de kêm kerdo. Goreyê pêkerdişê serê parekerdişê awa çemê Firatî ke serra 1987ine de mabêne hukmatê Şamî û dewleta tirke de amebi îmzakerdiş, ganî Tirkîya sanîyeyêke de 500 metrekupî awa çemî bidayîne Sûrîye, la tena 200 metrekupî dana. Netîceyê birnayîşê  awa Çemê Firatî de erdê dewanê Bûraz, Gir Sor, Cadeya Pîlî û Cadeya Qijî, Ibrîn, Îlçax, Şiyûxa Cêrîn û Şiyûxa Corîn, Torman û Qomilxî ziwa bî. Derheqê na babete de Îdarekarîya Heyetê Awe ya Herêma Firatî Xalîse Hec Qadirî ajansê ma rê qisey kerd.

 

'Dewleta tirke her fersendî de awa Çemê Firatê kêm kena'

 

Xalîse destpêkê qiseykerdişê xo de dîyar kerd ke menga yewin ê serra  2021ine heta roja ewro dewleta tirke Awa Çemê Firatî tewr zêde kêm kerdo û wina vat: "Demê peyîn de dewleta tirke bi hawayêke lez awe serê herême kêm kerd û menga 1î de na polîtikaye bi hawayêke zelal dest pêkerd, Kayê xo yê birnayîşê awe de kena û seba şaranê Herêma Vakur û Rojhelatê Sûrîye mîyanê zor û zehmetîyan de biciwîyê nê kena. Dewleta tirke serra 2017ine ra heta nika her fersend de awa Çemê Firatî kêm kena."

 

'Bi birnayîşê awe de dewleta tirke şerê xo kena'

 

Xalîse dewam de wina qal kerd: "Bi rayîrê awe cuya merdimî, şînayî dewam keno. Seba nê zî her kes lazimîyê xo bi awe vîneno. Sewbîna ma vanê, birnayîşê awe, tena bi têşanîya merdiman girêdaye nêyo, xeylêk çî xo dir xira keno. Nê çîyan ra zî ma eşkenê vajê, yew ci ra ramitiş peyser şino. Ceyran serê şarî de birîyeno û saetê ke yena veradayîş zî zaf kêmî yo. Lazimîyê rojane yê karkeran zî bi kêmkerdiş û birnayîşê awe dir lawaz beno. Awe damara cuye ya, bi birnayîşî awe dir dewleta tirke şerê xo dewam kena."

 

'Seba awe bîngehê cuye ya, dewleta tirke sey çekêke hemverê şaran şuxulnena'

 

Xalîse tewr peyîn wina vat: "Seba awe bingehê cuye ya, dewleta tirke sey çekêke hemverê şaran xebitnena. Ma hemverê birnayîşê awe de bêveng û bêçareserî nêmanenê. Ma timî çareserîyan peyda kenê, ma tim şarê xo dir hetkarî vejenê vernî û tu wext zî dewleta tirke nêeşkena bi rayîrî şerî îradeyê şaran û xebatanê ma lawaz bikero."