WAN - Dayîkê Aştîye venga beşdarîya Nobeta Edaletî ya Wanî kerdî, wina vatî: "Dem demê yewîye yo."

 

Nobeta Edaletî ya merdimê tepişteyan, seba tepişteyê nêweşî û yê înfazê înan ameyo veşnayîş, bêrê veradayîş Wan de dabî destpêkerdiş dewam kena. Dayîkê Aştîye ya ke şî serdayîşê merdimê tepişteyan û paştdayîş dayî Nobeta Edaletî venga pîlkerdişê nobete kerdî.

 

'Amancê ma tena oyo ke edalet ca bêro'

 

Dayîka Aştîye Zekîye Kayaya dîyar kerd ke ê verê merdimê tepişteyan de yê û vat: "Ma tim yenê serdayîşê merdimê tepişteyan. Tîya waştişê ma oyo ke cenaze zîndanan ra nêvejîyê û edalet bica bêro. Edalet seba hemine lazim o. Coka ganî her kes vengê xo vejîyo."

 

Îşkenceyê cenazeyan

 

Zekiye dewam de wina vat: "Tu telafî çîyê ke bi merdişî dir netîce bibo çin o, çareserî bicaardişê edaletî yo." Zekîye bale ant serê Hakan Aslano ke Sûrê Amedî de dinyaya xo bedelnaye û 7 serrî dima cenazeya ey tûrikêke de teslîmê pîyê ey amebi kerdiş û wina zêde kerd: "Ganî tu kes nê qebûl nêkero. Heq û huqûq ça de yo? Esteyê tutan tûrikan de teslîmê keyeyê înan ame kerdiş. Edalet ça de yo? Merg çare nêyo, tena çareserî edalet û aştî yo."

 

'Şîdetê psokolojîkî zî yeno kerdiş'

 

 Zekîye da zanayîş ke tepişteyê nêweşî û yê înfazê înan ameyo veşnayîş, nênê veradayîş û înan rê îşkenceyê fîzîkî yê psîkolojîkî kenê û vat: "Tepişteyê ke cezaya înan qedêna û ganî bêrê veradayîş la nênê veradayîş. Bi hîsê merdiman kay kenê. Sewbîna çîyê ke zîndan de Aysel Tugluke rê yenê kerdiş zî ma qebûl nêkenê. Ganî pêro tepişteyî serbest bêrê veradayîş."

 

'Do tim sereyê ma berz bo'

 

Zekiye vat, do bawerîya xo vînî nêkerê û wina dewam kerd: "Çîyê ke ameyê sereyê Semra Guzele adîl nêyê. Ez hewldayîşê seretewênayîşê bi zorî yê seba cinîyê kurdî û îşkenceyê înan rê yenê kerdiş, şermezar kena. Tu hetê nê çî bêro qebûlkerdiş çin o.  Sereyê ma berz o û do her tim zî berz bo. Ez pêro dayîkan dawetê Nobeda Edaletî kena. Dem demê yewîye yo."

 

'Teda û tecrîdêkê pîl esto'

 

Dayîka Aştîye Hurşe Turgute bale ant serê rewşa tepişteyê nêweşo 83 serre Mehmet Emin Ozkanî, wina vat: "Wa her kes bivîno. Serê tepişteyan de teda û tecrîdêkê pîl esto. Ganî peynîyê nê çî bîyarê."

 

Hurseya ke da zanayîş ke tena wazena edalet bica bêro û wina vat: "Heta dilopê gonîya min a peynîye zî ez o çîyê ke tepişteyî rî bi rî manenê, bîyarî ziwan. Tena seba xo ney, seba heme merdiman ez aştîye wazena."