Dîlan Babat - Oznur Deger

 

ANQARA - Welatijan dîyar kerd ke seba krîzê ekonomî çareser bibo, ganî îqtîdar bivuryo û vatî: “Vengê kesî nêvejêno. Merdimî nêwazenê bêrê tepiştiş. Êdî pabeyê mi dewlete ra çin o. Tena pird û camîyan virazneno. Ma se bikerê pird û camîyan? Şar vêşan gêreno. Wa Tayyîp şerm bikero.”

 

Seba krîzê ekonomî yê welatî, cinî nika ra hesabê zimistanî kenê. Bi abiyayîşê mekteban dir, keyeyî kewtê mîyanê  hewldayîş ke lazimîyê tutan senîn bigîrê. Heto bîn ra zî butçeyê şerî rê yeno visnayîş, feqîrî hîna giran keno.  Şar çareserîya nê krîzî bi vurnayîşê îqtîdarî vîneno.

 

Welatijê Anqarayî derheqê krîzê ekonomî û abiyayîşê mekteban de ercnayîş kerdî.

 

Taxa Ulusî yê Altindagê Anqarayî de welatijî mîkrofonê ma rê qisey kerdî û hînan tersê îqtîdarî awan kerdo, nêwaştî qisey bikerê û yê bînan zî vatî, seba nêwazenê bikewê zîndan, nêwazenê qisey bikerê.

 

Hîrê aşmî ez nêeşkena tutanê xo rê fêkî bigîrî

 

Fîgen Koluksak: Cuye vay a. Ma nêeşkenê çîyêk tutanê xo rê bigîrê. Hîrê aşmî yo nêeşkena fêkî tutanê xo rê bigîrî. Ganî no krîz bêro çareserkerdiş. Tutê mi wanenê. Hewteyo bêro do şêrê mekteb. La ma  hema çîyêk nêgirewto. Verê ma bi kîloyan çî girewtêne. Nika ma yewo yewo gênê. Defterî 13-14 û 16 TL yê. Ganî ma 7 defteran bigîrê. Ma do senî bigîrê. Ma şinê market û kasab la ma nêeşkenê çîyêk bigîrê. Ma bê penîr û zeytunan arayî kenê. Rûn û salçe her ke şino giran beno.

 

Wa êdî her kes hişyar bo

 

Cansel Çakir: Ma nêeşkenê debara xo bikerê. Tutê mi çar serre yo. La ma nêeşkenê ci rê çîyêk bigîrê. M abi meaşê asgarî debare kenê. Gaz vay bîyo. Qaleme bîya 13 TL. Ma nêwazenê êdî qisey bikerê. Kam bêro ma rayanê xo danê înan. Wina derbaz nêbeno. Ganî no îqtîdar bivuryo. Kam bêro yê verê başêr bibo. Vernîya ma zimistan a. Ma do se bikerê gelo? Ma do serdî ra bimirê. Ez nêwazena pîzeyê mi pirr bo, ez wazena ez bi haweyêk baş wey bibî. Goşt vay o. Fêkî vay o. Ma nêeşkenê bigîrê. Pereyê kesî çin o. Çare vurnayîşê îqtîdarî yo. Ganî êdî tu kes bêveng nêmano.

 

Ganî têkoşîn bêro dayîş

 

Dîlek Yildiz: Ma nêeşkenê debara xo bikerê. Nêweşa qanserî ya la ez nêeşkena derman bigîrî. Dewlete zî nêdana. Cuye zaf zehmet a. Kam bêro zî do sey înan bibo. Her çî vay beno. Zimistan vernîya ma de yo. Gelo ma do gaz senîn abikerê. Gelo yê wayîrê tutan se bikerê? Ganî her kes hemverê na rewşe têkoşîn bikerê. Tutî baş wey nêbenê.

 

Pabeyê ma na dewlete rê çin o

 

Urgiye Elhan: Dolaba mi veng a. Yê serê ma kêfê înan ca de yo, ekonomîye înan baş a. La şar perîşan o. No kes, dewlemendan tewr dewlemend kerd, feqîran zî tewr feqîr kerd. Ekonomî wina rast nêbena. Partîya newe bêro zî do wina bo. Merdimî nêeşkenê qisey bikerê. Tersenê ke bikewê zîndanan. Verê kamerayan de nêefterênê qisey bikerê. Ez tena ciwîyena, la ne kolî estê, ne zî komir esto. 100 TL fatureyê ceyranî ameyo la ez nêeşkena bidî. Şina bazar la çîyêk nêeşkena çîyêk bigîrî.

 

Merdimî vêşanê

 

Kiymet Karaca: Her çî vay o. Ma nêeşkenê debare bikerê. Vizêr şîya market mi salçe û sole bigirewtêne.  Hewteyê vîyarte de mi 19 TL awa firingiyan girewt la nika bîya 25ine. Nan bîyo 4 TL. Ma 5 kesî bi meaşê asgarî nêeşkenê debare bikerê. Mektebî abenê. La ma tu çîyêk nêgirewto. Cuye xeylêk vay a. Çenteyêk bîyo 300 TL. Wa ê serê dewlete de yê  şerm bikerê. Şar veşan gêreno. Wa carêkê biewnê ka rewşe şarî senîn a. Wa Tayyîp şerm bikero.

 

Şîyayê tutan xeylêk zêde yo

 

Sîbel Erdem: Debara nêmenda. Kam vaj o debare bena zuran kenê. Goreyê serra vîyarte ma her çî 4 kat vay gênê. Hefteyo bêro mektebî abenê la ma çîyêk zî tutan rê nêgirewto. Mektebî seranserê roje yê. Ganî ma mabêne de werd bere mekteb. Werdê mekteban vay o. Şîyayeyê tutan xeylêk zêde yo. Merdimî yan zaf dewlemend ê, yan zî zaf feqîr ê. Gelo do senîn vernîya nê bigîrê. Ma do bipawê û bivînê. Eke ma  fanatîkbîyayîşî vera bidê, ma do bivuryo. La sey tîmêk ma bi partîyêk bigîrê do wina dewam bikero. Ma fek  fanatîkbîyayîşê partiyan vera bidê ma do bivuryê.