Melîke Aydin

 

ÎZMÎR - Însîyatîfê Cinîyan ê Aştîye yê Îzmîrî Rozana Urkun da zanayîş ke xeylêk xebatê sey atolye û form dayê verê xo û venga pêro cinîyan kerd ke înîsiyatîf de ca bigîrê. Rozana vat, hedefê înan oyo ke no hewayê tersî bivurnê.

 

Înîsiyatîfê Cinîyan ê Aştiye ya Îzmîrî ke 1ê Êlule Roja Aştîye ya Dinya de netîceyê kombîyayîşî û forumê bi ca ardî de belgeye ke amade kerdibî de eşkera kerdî û awankerdişo xo îlan kerdî. Însiyatîf do hemverê şerî de xebatan bikero. Rozana Urkun derheqê înîsiyatîfê ke cinîyan ê partiyê sîyasî, rêxistinê cinîyan û femînîstî ci de ca gênê de ercnayîş kerd.

 

Rozana da zanayîş ke amancê înan oyo ke cinîyê hemverê şerî yê bîyarê têhet û hewayê tersî bişikênê.

 

Şerê serdestî yê camêrdan 

 

Rozana dîyar kerd ke şerê Tirkîya û eynî wextî de şerê Sûrîye û Ukraynayî pêroyî de tesîr serê cinî û tutan keno û prosesê ke şino weçînayîşan de polîtîkayê şerî tewr xidar beno û vat: “Seba cinî hemverê şerî de vatişê xo vajê, Însiyatîfê Cinîyan ê Îzmîrî awan kerdê. Polîtîkayê şerî yê îqtîdarî bi wareyê ke şer keno, sînor nêmaneno. No şerêko serdestî û cinsperestîyê camêrdan o. Nimûneyê şerî heta pêronameyê unîversîteyan yenê vetiş, tesîr keno. Reyna wendekarê unîversîteyî qetilkerdişê û kiştoxî yenê xelatkerdiş. Nê heme girêdayê polîtîkayê şerî yê.”

 

‘Şerê taybetî hemverê cinîyê kurdî de ameyo destpêkerdiş’

 

Rozana dewam de wina vat: “Gumanbarê Îpek Ere, çawîşo pispor Mûsa Orhan, gumanbarê serekeyê vînîkerdişê Gulîstan Doku Zaynal Abakarov yeno pawitiş. Hemverê cinîyê kurdî de polîtîkayê taybetî yenê kerdiş. Seba hêrsê karê yê kapîtalîzmî hemverê xoza zî şer ameyo destpêkerdiş. Cinîyê pawitoxê xoza wazenê nê şerî rê vajê ney. Tesîrê şerî serê ma hemine de keno. Ma cinî wazenê hemverê şerî de aştîye bimûnê. Ma aştîye wazenê. Ma seba nê ameyê têhet.”

 

Hedefê ma şikinayîşê tersî yo

 

Rozana tewr peyîn wina vat: “Senîn cinî hemverê cinsperestî yenê têhet, eşkenê hemverê şerî de zî bêrê têhet. Hedefê ma şikinayîşê hewayê tersî yo. Hedefê ma oyo ke ma xo biresnê xeylê cinîyan û munaqeşeyê pîlî bikerê. Ma venga pêro cinîyan kenê. Ma  bi atolyeyan bername û çalakî dayê vernîya xo. 1ê êlule de ma bi astengiya hêzê ked û demokrasî dir ameyî têhet. Ma serê sahne de belge wend. La ma meydanan de venga cinîyan kerd. Tîya ra tepya do venga ma pîl bibo. Ma pêro cinîyê ke aştî wazenê, dawetê însiyatîfî kenê.”