Zelal Tunç

 

WAN - Makbule Ozera nêweşe bîye û Zîndanê Tîpê Tyê Wanî ra ameye tehlîyekerdiş, wina vat: “Xeylêk tepişteyê nêweş û emrpîlî estê. Ganî lezabez bêrê veradayîş.”

 

Makbûle Ozera 80 serrî û bi nêweşîya girane Zîndanê Tîpê Tyê Wanî ra ameye tehlîyekerdiş. Makbule bi iddiayê "Hetkarîya rêxistine kerda” Artemêta Wanî de bi bahaneyê cezaya aye ya di serrî û aşmêke ameya tesdîqkerdiş, 9ê Gulane de amebî tepiştiş. 

 

Makbuleye prosesê çîyê zîndan de ciwîyaya ajansê ma rê pare kerd.

 

'Mi hewl da ez bi kurdkî problemanê xo vajî’

 

Makbule dîyar kerd, hewl daya problemanê xo bi kurdkî vajo û wina vat: “Dimayê ke mi tepiştî, mi şawitî zîndan. Uca de embazan seba lazimîyê min ê şexsî hetkarîya mi kerdî. Bi xêrê kursîya çerxe mi hereket kerdêne. Problemê min ê nêweşîya şekir û tansiyonî rî da. Ez bi nêweşa qelbî zî bîye. Di rojan ra reyke mi ardêne nêweşxane. Tewr peyîn zî seba ATKyî şîya Stenbol. Bi teyare mi berdî uca. Mi vat, ez bi tirkî nêzana. Bi kurdkî mi hewl da ez problemanê xo bîyarî ziwan. Dim ara mi reyna ardî Wan. Vizêr serê siba zî reyna seba dermanan mi berdî revir. Dimayê ke mi dermanê xo girewt, mi ra vatî ti ameya tehlîyekerdiş.”

 

‘Ganî aştî bi ca bêro’

 

Makbule da zanayîş ke zîndanan de xeylêk tepişteyê nêweşî estê û wina va: “Waştişê mi oyo ke heme tepişteyê nêweşî û mêrdeyê mi Hadi Ozer bêro veradayîş. Ez wazena na game aştî bêro. Kesê ke qawişa mi de pêro ciwanî bî û tu sûcê înan çinbi. Ez hêvî kena ê zî na game bêrê veradayîş.”

 

‘Bi seyan tepişteyê sey mi nêweş estê’

 

Makbule dîyar kerd, baş o ke seba sûcêke edlî nêameya tepiştiş û wina vat: “Bi seyan cinîyê sey mi nêweşî zîndan de yê. Werrekna ê zî biameyîne veradayîş.”

 

'Ganî paştdayîşê heme tepişteyan bêro kerdiş’

 

Makbule vat, roja ke ameya tepiştiş heta nika xeylêk paştdayîş dîya û vat: “Ez seba înan sipas kena. Mi tena nêverdayî. Ez vana ganî paştdayîşê pêro tepişteyan bêro kerdiş.”