Sema Çaglak

 

ŞIRNEX - Cinîyê Şirnexijî dîyar kerdî ke bi girankerdişê tecrîdî dir şerê ke hemverê kurdan de yeno kerdiş zî giran beno û wina vatî: “Eke tecrîd bêro peynîkerdiş tena seba kurdan ney, seba pêro şarê Rojhelatê Mîyanên do bibo destkewtişêk pîl.”

 

Rayberê PKKyî  Abdullah Ocalan Zîndanê Tîpê Fyê bi Asayîşê Berzî yê Îmraliyî de binê şert û mercê giranan ê tecrîdî de yeno tepiştiş. Qerarê qedexeyê pêvînayîşê ey yê bi avûkatan dir ke 12yê teşrîna verêne 2021î de amebi dayîş, 22yê Nîsane de peynî bi. Dimayê wedaritişê qedexeyî bi seba pêvînayîşî xeylêk reyan hem avûkatî û keyeyî muracat kerd, la tu cewabêk nêame dayîş. Cinîyê Şirnexijî reaksîyon vera tecrîdê girankerde de dayî û waştişê azadîya Abdullah Ocalanî kerdî.

 

Kiymet Ecere reaksîyon mojna û vat: “Ma nêwazenê şer virazyo, şer xo dir merg ano. Ma hem tecrîdê serê tepişteyan, hem zî serê birêz Ocalanî şermezar kenê. Tecrîdê Îmraliyî tesîrê xo serê şarî de zî keno. Eke seba Abdullah Ocalanî şîyayîş û ameyîş bibayîne, şer zî hende dewam nêkerdêne. Bi Abdullah Ocalanî dir pêvînayîş nêno kerdiş û her ke şino tecrîd giran kenê. La ma şer nêwzenê. Serek aştîye wazeno û seba aştîye çareserî pêşnîyaz keno. Eke tecrîd bêro peynîkerdiş, seba şarê  Rojhelatê Mîyanên de do deskewtişêk pîl bibo.”

 

‘Tecrîd girêdayeyê sîstemî yo’

 

Kiymete, dîyar kerd ke tecrîdê serê Abdullah Ocalanî tecrîdê serê cinî û şarî yo û vat: “Hemverê cinîyan de şerêkê pîl yeno kerdiş. No sîstem nêwazeno cinî bindestî ra xelas bibê. Tecrîd zî girêdeyeyê sîstemî yo. Hemverê tecrîdî û sîstemê bîyaye xoverdayîşê tewr pîlî cinî danê. Eke serekê ma azad bibo, seba pêro şaranê bindest û şarê aştîwaşteyî hizûrêke pîl do bibo.”

 

’24 serrî yo xo ver dano’

 

Zerê Aytiş zî eşkera kerd ke Şarê Kurdî bi serran o seba aştîyêke mende vengê xo berz keno û vat: “Seba ke no şer peynî bibo û aştîyêke mende bibo, ganî tecrîdê serê Abdullah Ocalanî bêro peynîkerdiş. Bi 24 serrî yo Abdullah Ocalan mîyanê çar dêsan de xo ver dano.  Heta ke serekê ma azad nêbo, ne şer qedêno, ne zî rijnayîşê gonî yeno vindarnayîş. Zerrîya ma seba aştîye dana piro û ma aştîye wazenê.”

 

‘Gama serekê ma azad bibo, ma zî azad benê’

 

Êmîne Oruç zî vera tecrîdî reaksîyon mojna û vat: “Zulmêko pîl serê ma û serê Serekî de esto. Ma dewleta Tirke şermezar kene. Hemverê serekê ma de heme qanûnî ameyê binpaykerdiş. Ma wazenê Serekê ma bi avûkatan û keyeyê xo dir pêvînayîş bikero û bireso azadîya xo. Gama serekê ma azad bibo ma zî azad benê.”

 

‘Kurdî azadîya Ocalanî wazenê’

 

Tewr peyîn Nuriye Atmiş qisey kerd û vat: “Kurd tena dewaya bîyayîşê xo kenê. Seba nê zî azadiya Abdullah Ocalanî wazenê. Seba ke kurdî vanê ma estê, zordestî înan rê yeno kerdiş. Tu heqê Erdoganî çin o ke hêrişê Rojawanî bikero û hêrişê şarê Rojhelato Miyanên bikero. Erdogan hemverê kurdan de hêrişêk hîra dayo destpêkerdiş û bi nê dir sûcê şerî keno. Ma dayikî venga her çar parçeyê Kurdîstanî kenê û vanê wa kurdî bibê yew û seba aştî û azadîye tifaqê xo bi ca bîyarê. Eke tîfaqê ma bibo tu kes nêeşkeno vernîya ma bigîro. Tirkan ra dost nêbeno. Demo ke  kurdî bibê yew, do serbikewê.”