WAN - Cinîyan hemverê tepiştiş û şîdetê parlamentera HDPyî Semra Guzele reaksîyon mojna û vat: “Şima do nêeşkê serê kayanê xo padê. Semra Guzele rumeta ma ya, îradeyê ma ya. Ma bi rêxistinbîyaye cewabê şima bidê.”

 

Parlamentera Partîya Demokratîke ya Şaran (HDP) ya Amedî Semra Guzele ke hedef ameye mojnayîş, destnêdayîşê aye ame wedaritiş û lezabez derheqê aye de cipersayîş ame destpêkerdiş û vernîya di rojan zî Stenbol de ameye destbendkerdiş. Destbendkerdişê Semraye vernê de hetê Wezîrê Karê Zereyî Suleyman Soylu û Mudurîyê Emniyetî yê Stenbolî ra serê hesabê medyaya dîjîtale de ame neqlkerdiş Goreyê dîmenê ke vejîyayî werte, netîceyê destbendkerdişî de polîsan Semra rê şîdet kerdê û waştê ke sereyê aye bitewênê. Hemverê nê caardişan cinîyê sîyasetmedarî yê Wanî reaksîyon mojna.

 

‘Semra îradeyê ma ya’  

 

Vervatoxa Meclîsê Cinîyan ê DBPyî Aynur Sarica da zanayîş ke polîtîkayê tedayê înan do peyser game nêdê eştiş û vat: “Tepiştiş, surgun, merdişî nêeşkenê sereyê ma bitewênê. Ma do her ware de bi rêxistinî bimojnê ke ganî hemverê cinîya kurde rêzdar bê. Semra Guzele rumeta ma, îradeyê ma ya. Do ê nê kumpas û kayanê xo de bifetisyê.”

 

‘Hewl danê lêşinîyê xo binimnê’

 

Parlamentera HDPyî ya Wanî Muazzez Orhan zî reaksîyon vera tepiştiş û şîdetê hemverê Semra mojna û vat, azadîya Semraye hetê AKP-MHPyî ra bi kumpasêk lêşin ameya xespkerdiş û wina vat: “Caardişê hemverê Semra nêeşkeno bêro qebûlkerdiş. Ne huqûq de  de ne zî merdimayî de no nêeşkeno bêro qebûlkerdiş. Hewl danê ke lêşinîyanê xo binimnê. No keso ke wezîrê karê zereyî bi çeteyan dir, bêusulîyan dir rêz bi reze fotografê ey estê û kumpasêk wina keno ke lêşinîyanê xo binimno.”

 

‘Cinîya rêxistinkerde hedef yena girewtiş’

 

Muazzeze wina qedêna: “Cinîyê kurdî kumpas veng vetê. Tu kayê lêşin nêeşkeno nê îradeyî çin bikero. Ma verê Semra Guzele de yê. He roje 4 cinî yenê qetilkerdiş û polîtîkayê dişminîyê cinîyan sewîyeya tewr corî de ya. Bêguman yê ke têkoşînê cinîyan danê hedef yenê girewtiş. Semra Guzele siyasetmedarêk ke înan deşîfre kerdêne bî û tu wext hemverê şîdetî de sere nêtewêna.”

 

‘Ma do têkoşîn berz bikerê’

 

Hemsereka HDPyî ya Wanî Handan Karakoyun zî dîyar kerd ke wezaretê karê zereyî partîya înan her tim hedef nîşan dano û vat: “Tevgerê îqtîdarî yê hemverê  parlamentera ma her çî mojneno. Peynîya îqtîdarî ameya. Şîdet parlamentera ma kenê û wazenê ke sere bidê tewênayîş. La do ê nêresê amancê xo. Ma do têkoşînê xo wareyan de bidê û cewabo tewr baş bidê înan.”