ANQARA – Derheqê tepiştişê parlamentera HDPyî Semra Guzele de Komîsyonê Cinîyan ê Merkezî yê ÎHDyî eşkerayîyêke da û vat: "Çîyo ke hemverê Semra de bi ca ame, metodê îşkenceyî yo. Ganî derheqê berpirsîyaran de cipersayîş bêro akerdiş û wezîfe ra bêrê dûrvistiş.”

 

Komîsyonê Cinîyan ê Merkezî yê Komeleya Heqê Merdiman (ÎHD), derheqê tepiştişê parlamentera Partîya Demokratîke ya Şaran (HDP)yê Amedî de Semra Guzele eşkerayîyêke nuşteyî weşêna.  

 

Eşkerayî de wina ame vatiş:

 

"Maddeyê 17ine ê Destûrê Bingehîn de heqê her kesî esto ke bîyayişê xo yê madî û manewî bipawo û aver bero. Goreyê qanûnî amanc pawitişê rûmetê merdiman o û sewbîna ameyo dîyarkerdiş ke tu kes nêeşkeno rastê 'îşkenceyî' bêro û nêeşkenê rûmetê merdiman bişikinê. Sûcê îşkenceyî ke qanûnê neteweyî û mîyanneteweyî de sey sûcê hemverê merdimayî yeno vînayîş û her şert û mercî de qedexe yo; cinîya ke hema parlamenter a û bi serran o wareyê heqê cinîyan de xebityena, vernîya  kamerayan de sûcêk yeno kerdiş û bi asanî no suc yeno parekerdiş. Endîşeyê ma yê binpaykerdişê heqê cinîyan zêde keno.

 

Ame famkerdiş ke seba normalîzekerdişê kerdoxê îşkence û muameleyê xirab ameyo kerdiş û kesê ke sûc kerde zî bi caardişê bêcezakerdişî ra bawer ê. Teda, destbendkerdiş û tepiştiş, îşkence û muameleyo xirab, sûcê heqaretî û parekerdişê ê fotografan, endîşeyê ma yê hemverê cinîyê ke wareyê heqê cinîyan de xebityenê û heqê cinîyan pawenê, sîyasetmedarê cinî xususî cinîyê kurdî rê zêde kerdo. 

 

Ma pabeyê ke derheqê gumanbaran de sûcê ke ameyê kerdiş de ganî cipersayîşê sûcî bêro destpêkerdiş û gumanbarî wezîfeyê xo ra bêrê dûrvistiş. Ma reyke bîn dîyar kenê ke ma do têkoşînê xo yê hemverê  tedayan dewam bikerê.”