WAN - Taxa Xaçortî de ciwanî ameyî têhet û hêrişê Tirkîyaye yê serê Zapî şermezar kerdî. Sewbîna ciwanan bale ant serê hêrişê dewleta tirke yê hemverê Rojawanî. 

 

Taxa Xaçortî de ciwanî ameyî têhet û hêrişê Tirkîya yê serê Zap û Rojawanî şermezar kerdî. Ciwanan pankartê bi nuşteyê "Bicîwîyo xoverdayîşê Zapî" akerdî fîşekê hewayî teqênayî û bi adirê ke vistî ta zî bale antî serê hêrişan. 

 

Polîsî demo ke ameyî kuçe, mabêne polîs û ciwanan de munaqeşe vejîya. Xeylêk TOMA û wesayitê zirxî sewqê taxe ameyî kerdiş û munaqeşeyê mabêne ciwan û polîsan de demêk derg dewam kerd.