Sema Çaglak

 

ŞIRNEX - Cinîyê ke beşdarê mîtîngê Silopî yê seba 1ê Êlule Roja Aştîye ya Dinya bî, dîyar kerdî ke ê hem seba ke hemverê şerî venga yewîye bikerê û hem zî seba ke bibê vengê cinîyê ke ameyê qetilkerdiş nê wareyê de yê.

 

1ê Êlule Roja Aştîye ya Dinya hem herême, hem zî Tirkîya de bi mesajê xo yê, hemverê şerî venga aştîye bi coşêkê pîl ame kerdiş. Nê cayan ke mîtîng ame organîzekerdiş zî qezaya Sîlopî ya Şirnexî ke bi sloganê “Şer merg o, aştî cuye ya” ame pîroz kerdiş. Cinîyê ke tewrê mîtîngî bîbî, mesajê xo yê seba aştîye, ware de ardî ziwan.

 

Cinîyan ra Muzeyyen Înan, destpêkê qiseykerdişê xo de 1ê Êlule temamê şarê bindestî û aştîwaştox pîroz kerd û wina vat: “Her cayê dinya de şer esto û êdî dayîkî şer û rijnayîşê gonî ra hêsirî çiman de nêmendî. Wa 1ê Êlule bibo wesîleya yewîya Şarê Kurdî. Ma prosesêkê şerî ra derbaz bene û yê ke paştdayîşê nê şerî kenê ma înan nalet û şermezar kenê. Hemverê nê şerî de lazim o ke kurdî  tifaqê xo awan bikerê û herra xo biapwê.”

 

‘Ma nê ware de vengê cinîyê ke ameyê qetilkerdişî yê’

 

Kader Bayram zî bale ant  serê qetilkerdişê cinîyan û dîyar kerd ke ê do bi têkoşînê xo vernîya qirkerdişan bigîrê û vat: “Ma ewro hem seba aştîye, hem zî seba ke reaksîyonê xo hemverê qetilkerdişê cinîyan bimojnê tîya de yê. Reaksîyon û hêrsê ma yê hemverê şîdet û qirkerdişê sere cinîyan her ke şino tewr zêde beno. Ewro ma nê wareyî de eynî wextî de vengê cinîyê ke ameyê qetilkerdişî yê. Nê welatî de qetilkerdişê cinîyan sewîyeya tewr corî de ya. Seba ke ma vernîya nê qirkerdişan bigîrê, ganî ma têkoşînê xo tewr pîl bikerê.”

 

‘Dayîkî şer nêwazenê’

 

Hacer Boydan zî vat, bi aştîye cuyêka bi rûmet do bêro awankerdiş û vat: “Ma wazenê her çar parçeyê Kurdistanî de nê hêriş û işxalkerdişî peynî bibê. Waştiş û hêvîya ma ya tewr zaf aya ke Şarê Kurdî bireso azadîya xo. Ma dayîkî şer nêwazenê û seba pêro şaran cuyêka aştîyane û hizûr wazenê. Tu cîyayî şarêk bîn çin o.”

 

‘Çareserî şer de nêyo israrbîyayîşî de yo’

 

Elfesya Nas zî wina vat: “Ma roja aştîye temamê şarê xo rê pîroz kenê. Bi coşêk pîl ma ameyî ware. Tu serdemî de bi şer serkewtişêk nêvirazyayo û do ewro zî nêvirazyo. Aştîye xo dir serkewtiş zî ana. Amanc û vindertişê ma zî no het ra yo. Sewbîna ma wazenê qetilkerdişê cinîyan zî peynî bibo. Nimûneyo tewr somut, çend rojî vere esteyê Hakan Arslan torbeyêk de teslîmê pîyê ey ame kerdiş. Şer dejî ra wetayêr çîyêk bîn nêdano. Coka ma aştîye de bi israr ê û heta ke aştîyêke mende nêro nê welatî ma do têkoşînê xo pîl bikerê.”

 

‘Aştî bi rayîrê diyalogî mumkun o’

 

Tewr peyîn zî Leyla Tatli qisey kerd û vat: “Seba na roje ma venga pêro şaran kenê ke hemverê şerî de vengê xo tewr berz bikerê. Êdî wa şarê ma nêro kiştiş û aştî bi ca bêro. Seba ke aştî bêro, ganî rayîrê diyalogî û vindertişêk samîmî bibo. Wa zerrîya dayîkanê ma nêveşîyo. Tena seba Şarê Kurdî ney, seba pêro şarê dinya, ma aştîye wazenê. Ma sey cinî a roje bi taybetî seba dayîkanê xo xelat kenê.”