Sema Çaglak

 

ŞIRNEX - Dayikê Şirnexijî hêrişê Arteşa Tirke yê serê Rojawanî şermezar kerdî û diyar kerdî ke kurdî serê herra xo de ciwîyenê, çi karê Tirkîya Rojawan de esto. Dayîkan vat, “Gonî bi gonî nêna şûtene, kurd aştîwaştox ê û dewaya nasnameyê xo kenê.”

 

Artêşa Tirke 17ê Nîsane de hemverê herêmê Zap, Avaşîn û Metîna yê Herêma Federe ya Kurdistanî de hêrişêkê hîra dabî destpêkerdiş. Çarçewaya hêrişê xo de bi desan rey, çekê kimyewî xebitnayîne û sûcê şer kerd. Sewbîna xoza talan kerd û sînorê bîyaye binpay kerd. Pêwa ke nê hêrişê xo de bê netîce mend, na rey zî hêrişê Rojawan kerd û hetêke ra zî hêrîşê xo yê hemverê Rojawan, Mexmûr û Şengalî de dewam keno. Reaksîyon û nêrazîbîyayîşê cinîyan ê hemverê hêrişê Tirkîya serê Kurdistanî de her ke şino pîl beno. Yew nê reaksîyonan ra zî dayikê Şirnexijan ra ame.

 

Cinîyan ra Taybet Tatli dîyar kerd ke Tirkîya amancê DAîŞî ke nêmced mendibi wazena temam bikero û vat: “Rojawan bi gonîya şehîdan ameyo awdayîş. Her ca de bi hezaran şehîd estê. DAÎŞo ke vera Rojawanî de vînî kerd, nika Tirkîya wazena şer bikero. Çi karê Tirkîya Rojawan de esto. Heta ma sax bê, ma pey Rojawan de yê. Wa kurdî bibê yew û îxanet yewbînan rê nêkerê. Rojawan bi gonîya şehîdan ameya awdayîş û do bi têkoşîn bêro xelaskerdiş. Hemverê nê êrişan ganî kurdî deste xo bidê yewbînan. Wa êdî tutê ma nêrê kiştiş. Lazim o ke heme kurdî tîfaqê xo awan bikerê û hemverê nê zulmî de bibê yew.”

 

‘Ma dewaya nasname û esteyanê xo kenê’

 

Emîne Alkiş zî ard ziwan ke bi serran o dişminê kurdan bi tank, tifing û bombavaranan wazenê kurdan biqedênê û wina vat: “Tu heqê Tirkîya ke hêrişê Rojawan bikero çin o. Rojawan herra şima nêya, başûr herra şima nêya. No hukmat, hukmatêko zilmkar o û heme hêzê xo bi dişmînîyê şarê Kurdî xebitneno. Kurdî wazenê heqê xo bidest bikerê. Ma dewaya nasname û esteyanê xo kenê. Vengdayîşê mi her çar parçeyê Kurdîstanî rê esto, wa kurdî bibê yew. Eke yew nêbê, do dewletê gonîwerî hêrişanê xo tewr zêde bikerê. Ganî kurdî vernîya nê hêrişan bigîrê. Serkewtiş do şarê Kurdî bo.”

 

‘Gonî bi gonî nêna şûtiş’

 

Tewr peyîn zî Asya Tay qisey kerd û vat:  “Yê ke vanê ma heqê merdiman pawenê, wa nê zulmê serê kurdan de bivînê. Pêro dewletî nê zulmê Tirkîya bivînê. Çira bêveng manenê. Gonî bi gonî nêna şûtiş. Ganî no şer bêro vindarnayîş. Ma nêwazenê şer virazyo. Ez veng dana huqûqnasan, sazgeh û rêxisitinê mîyanneteweyî kena, wa vernîya nê şerî bigîrê û rayîrê dîyalogî bêro akerdiş. Ma dewaya mal û milkî kesêk ra nêkerdo. Ma  tena dewaya heqê xo kenê. Çi heqê Tirkîya esto ke hêrişê Rojawan kena. Zerrî û kezeba dayîkan veşnena. Ma nêwazenê tu kes bêro kiştiş. Dayikî nêwazenê gonî birijo û aştîye wazenê.”