Oznur Deger

 

ANQARA - Sîyasetmedaran derheqê 1ê êlule Roja Aştîye ya Dinya de hêviyê xo ardî ziwan û vatî, do aştîye biqîrê.

 

Hemverê şerê sere de Rojhilatê Mîyanên û heme dinya yeno dewamkerdiş, bi wesîleyê 1ê Êlule Roja Aştîye ya Dinya vengdayîş yeno kerdiş. Sîyasetmedarê cinî derheqê manaya 1ê Êlule Roja Aştîye ya Dinya de ajansê ma rê mesajê xo pare kerdî.

 

Mesajê siyasetmedaranê cinîyan ê 1ê Êlule wina yo:

 

Hemverê şerî de vindarnayîş xeylêk muhîm o

 

Serekwekîla Koma HDPyî Meral Daniş Beştaş: Hemverbîyayîşê şerî, pawitişê aştîye yew xetê esasî yê HDPyî yê. Bi serran o ma seba nê têkoşîn kenê û nê wareyî de xebatê ma estê. Şer bi heme komelî dano vînîkerdiş. Îqtîdar her reya ke keweno tengasî hemverê Kurdan operasyonê dersînor keno. Tehdîdê ‘şewêke de ma do nêşkeva bêrê’ her wext reyna kenê. Tirkîya hema zî Rojawan, Vakur û Rojhelatê Sûrîye herême îdare kena. Çeteyêkê serê nameyê Tirkîya de rayîr benê, uca de sûcanê tewir bi tewir kenê. Hemverê merdimayî sûc kenê û rayaumumî nê zana. No raporê NYyî de zî esto. Pawitişê erjê merdimayî, hemverê şerî de ma sey parametre vînenê. Ma endamê partîyêke cuyêka têduşt wazenê û azadî wazenê yê.

 

Ma do pêro wareyê Tirkîya de meydanan de bê

 

Wan û Şirnex de do di mîtîngê ma yê pîlî bêrê organîzekerdiş. La ma do pêro bajarê bînî yê Tirkîya de zî wareyan de bê. Ma do bi hêzê demokrasî û sazgehê komelê sivîlî bi sloganê ‘Şer dano vînîkerdiş, aştî dano qezenckerdiş’ wareyan de bê. Waştişê aştîye û vera şerî de xeylêk girîng o. 1ê êlule rewşa normalî de sey rojêka normal yena zanayîş la ewro Tirkîya hem zere de hem teber de şer ferz kena. Îqtîdar seba bekaya xo bica bîyaro nê ferz kena. Ma hemverê nê de vatişê xo vajê.

 

Aştîya tewr xirab şero tewr heqdarî ra başêr a

 

Temsîlkara sereka Pêroyî ya CHPyî Gamze Akkuş Îlgezî: Cîcerî vano aştîya tewr xirab, şerê bîyaye yê heqdarin rê başêr a. Seba aştîye bi têkoşîn dejantiş, bêvengîya hemverê şerî bêguman tevgerêk bi rûmet o. Seba aştî bibo şîîra tewr weş, ez o heta peynî bişuxilî. Ez o seba aştîye biqîrî. Seba ma û pêro dinya rayîrêkê bîn çin o. Bi hêvîya ke 1ê êlule aştîye bîyaro na herre ser û heme dinya.

 

Aştî bi qasê nan û awe girîng a

 

Parlamentera HDPyî ya Mûşî Gulîstan Kiliç Koçyîgît: Hetê NYyî ra 1ê êlule sey Roja Aştîye ya Dinya ame îlankerdiş û a roje de sey roja aştîye yena pîrozkerdiş. Cografya ma seba ke cografêyêka zaf bi gonîn a, aştî seba ma qasê nan û awe girîng a. Serê herra ma de îqtîdar gonî, hesêran û pêrodayîş ferz keno. Hewl danê ke îfade bikerê yewin formê cuye no yo. Îqtîdarê ke serê na gonî de pîl benê estê. La cinî, şar û heme komel dej ancenê. Ma emsar 1ê êlule de wazenê girîngîyê aştîye bîyarê ziwan. Seba ke şer bixo qirkerdişê şaran o, xoza cinî û bawerîye yo. Ganî ma hemverê nê qirkerdişî seba aştîye bêrê têhet. No zî bi rêxistinbîyayîş mumkin o. Ganî ma hemverê şerî de vengê xo berz bikerê.

 

Ma do 1ê êlule de wareyan de bê

 

Sereka Partîya Kede (EMEP) ya Stenbolî Sema Barbaros: Ma prosesêkê kesê masaya şerê emperyalîstan de zêde bîyê, prosesêkê toximê dişminî newe ra ameyê ramitiş,  binpaykerdişê heqan û teda zêde bîyê de yê, têkoşînê zîndanan dewam keno û ma ver bi 1ê êlule şinê. Ma sey EMEPî seba hemverê şerî de bibê yew, her kesî dawetê meydanan kenê. Ma seba dinyayêka bê şer meydanan de bê.

 

Heta kapîtalîzm vînî nêkero merdim nêeşkeno qalê aştîye bikero

 

Sereka Pêroyî ya Partîya Şorişgêrî Elîf Torun Oneren: Heta ke sîstemê emperyalîst, kapîtalîst, welatê ke tekelê înan de yê û îqtîdarê ê welatan bibê, merdim nêeşkeno qalê aştîyêk rast bikero. Yê ke aştîye bîyarê do cinî, ciwanî û şaro ke xo ver dano bîyaro. Bedela şerê AKP-MHPyî reyna şaro  bindest dano. Tutî û cinî danê. Sinifa karkeran dana. Heta ke sîstemê emperyalîst, kapîtalîst çin nêbo merdim nêeşkeno aştiyek mende bikero. Ez heme kesê ke seba aştîye têkoşîn kenê silam kena.”