AMED - Cinîyan reaksîyon vera hêrişê Tirkîyayî yê hemverê Rojawanî de dayî û vatî: “No îşxalkerdişê çimsûrî yê Kurdistanî tu cayêk bîn ê dinya de çin o. Gelo çi karê ey serê herra Rojawanî de esto.”

 

Tirkîya 16ê Tebaxe de hemverê Rojawanî de hêriş da destpêkerdiş û hêrîşê hewayî û bejayî de heta nika xeylêk tutî birîndar bî, hûmara kesê ke dinyaya xo bedelnayî zî her ke şina zêde bena. Rêxistina komela sivîlî ke merkezê ci Îngîlîstan de yo û heqê tutanê dinya pawena ‘Save the Chîldren’ eşkerayîye de dîyar kerd, aşma Tebaxe de Qamişlo û Til Rifatî de di hêrişê cîya bi ac ameyê û di tutan dinyaya xo bedelnaye û tewr tay 5 zî birîndar bîyê. 16ê Tebaxe de Kobanî de tutêk, 19ê Tebaxe de bajarokê El Babî de hêrişê hemverê bazarek de 6 tutî û eynî roje de Vakur û Rojhelatê Sûrîye de hêrişê dronan de 4 tutê kênayî ameyî qetilkerdiş 11 hebî zî birîndar bî. Rêxitina komela sivîlî dîyar kerd ke hêrişê Til Rifetî de 2 tutî birîndar bîyê.

 

‘Vengê bombeyan kêm nêbeno’

 

Necîme Yaşaer venga yewîye kerd û vat: “Dewleta tirke tena hêrişê Kobanî de ney, hêrişê pêro ko, bax û baxçe û zîndanê kurdan kena. Gelo merdim dewletêka ke tutan kişinena çi bipawo? Her çar hetê Kurdistanî binê tecrîdî de yo. Vengê bombayan nêno birnayîş. Koyê ma yenê bombavarankerdiş. Bêvengî merg a. Ma çiqas bêveng bê, do merg zî peyê ma de bibo. Ma na herre de ciwîyenê. Ma pêro dest bidê yewbînan û wa no zulm werte ra wedaryo. Ma nêwazenê tu kes bimiro.”

 

‘Seba tutanê kurdan heq û hiqûq çin o’

 

Yildiz Damla ke 2015ine de kênaya xo Stêrk Ciwane Kobanî de vînî kerd, wina vat: “Rojawan û Başûr de qirkerdişê pîlî yenê ciwîyayîş. La no şer bi serewedaritişê dayikan do peynî bibo. Rojawan de hêrişê nêweşxane û mekteban kenê. Gelo çira Ewropa bêveng a? Dîyar o engişta Ewropa zî ci de esta. Ez venga dayîkan zî kena; ma hemverê şerî de vinderê. Dayikî tutanê xo pîl kenê û dima ra mecbûr manenê şêrê. Dewlete nê tutan rê nêheqî kena. Seba tutanê Kurdî heq û huqûq bica nêno. Ma aştîye wazenê. Ma nêwazenê gonîya tutan birijîyo.”

 

‘Tutê Kobanê tutê ma yê’

 

Endama Meclîsê Dayikanê Aştîye Nafiye Yîgît zî wina qal kerd: “Tutê ke hetê AKP-MHPyî ra yenê qetilkerdiş tutê Kurdî yê. Yê ke xo ra vanê ma musliman ê, nêşinê mekteban de tutan bombavaran nêkenê. Rojawan de tut, cinî, kal û pîr, ciwanî yenê qetilkerfiş. No zulmêk pîl o. Ma Dayikê Aştîye hemverê nê şerî yê. Tutê Kobanî zî tutê ma yê. Fek nê şerê lêşin ra vera bidê. Wa gonîya tutanê ma nêrijîyo. No wehşetê Kurdistanî tu cayêk de çin o. Gelo çi karê înan Rojawan de esto? Nê tutî cuyêka weş pawenê. Ma her wext destê aştiye derg kerd, la înan derg nêkerd. Wa her kes bizano ke heta nê dejî peynî nêbê, do dayîkî xo ver bidê. Wa dewlete baş bizano ke kurdî qetî nêqedîyê û do tim bibê.”