STENBOL - Çalakîya "Nobeta Edaletî" ya keyeyê tepişteyan ê Stenbolî de, vizêr nêzdîyê 40 kesî amebî destbendkerdiş. Temamê destbendkerdeyî ameyî veradayîş.

 

Merdimê tepişteyî, seba veradayîşê tepişteyê nêweşî û yê ke înfazê înan ameyo veşnayîş, hewteyê 21ine de vizêr Stenbol de waştî vernîya bîna de Rêxistina Partîya Demokratîke ya Şaran (HDP) ya Bahçelîevlerî de çalakîya Nobeta Edaletî organîze bikerê. Labelê polîsan hêrişê çalakîkeran kerd û netîce de 40 kesî bi kuyayîş ameyî destbendkerdiş. Kesê destbendkerdeyan berdî Mudûrîyê Emnîyetî yê Bahçelîevlerî. Dimayê kar û barê îfadegirewtişî, temamê destbendkerdeyî şewa bîne ameyî veradayîş. 

 

Nameyê hîn kesê ke bi îşkence amebî destbendkerdiş û dima ra ameyî veradayîş wina yê: Fînce Akman, Cemîle Çîftçî, Cemîle Karakaş, Kumrî Akgul, Zeynep Calihan, Hemsereka HDPyî ya Kuçukçekmeceyî Gulsum Ozturk, Suleyman Çelîk, Hemsereka HDPyî ya Bahçelîevlerî Fatma Çatak, Resûl Çatak, Vervatoxê HDKyî yê Stenbolî Erkan Tepelî, Fîkrî Oztürk, Hemsereka ANYAKAY-DERî Evîn Genç, Hemserekê HDPyî yê Bakirkoyî Sadik Yilmaz û Endama Meclisê Ciwanan Mîzgîn Taşdemîr.