ANQARA - Tepişteyo bi nameyê Îbrahîm Sutçu da zanayîş ke Zîndanê Eregli yê Konyayî de gardîyanî hewteyêkê de çar rey qawişan gêrenê û vat, pêro eşyayê înan eştê erd. Îbrahîmî vat, seba ke înan îtiraz kerdo, coka derheqê înan de cipersayîş ameyo destpêkerdiş. Dayîka Îbrahîm, Nazîfe Sutçu vengdayîşê hîsgêrî kerd.

 

Binpaykerdişê heqê zîndanan her ke şino zêde beno. Ame dîyarkerdiş ke tepişteyî Zîndanê Eregli yê Konyayî de binê tedayî de yê. Tepişteyo bi nameyê Îbrahîm Sutçu bi rayîrê telefonî dir keyeyê xo rê binpaykerdişê heqan ê zîndanan neql kerd.

 

Seba ke îtiraz kerdî, derheqê înan de tehqîqat ame destpêkerdiş

 

Îbrahîmî da zanayîş ke hewteyêkê de 4 rey gardîyanî eştî serê qawişan û wina vat: “Demo ke erzenê serê qawişan heme eşyayê ma erzenê serê erdî. Betanî û çarşefanê ma berdî. Ma zî îtiraz kerd. Nê ser de derheqê ma de tehqîqatê dîsîplînî dayî destpêkerdiş. Mehmet Işiktaşî zî wextê binpaykerdişê heqan neql kerd, telefonê ey ame birnayîş. Bi destpêkerdişê tehqîqatan ser o de ma tehdîd kenê.”

 

'Amanc o yo ke cezaya tutanê înan bêro zêdekerdiş'

 

Dayîka Îbrahîmî, Nazîfe Sutçu dîyar kerd amanc o yo ke cezaya tutanê înan bêra zêdekerdiş û wina vat: "Lajê mi pêvînayîşê telefonî de dîyar kerd ke ê mîyanê rewşêka zehmet de yê. Vat, înan îtiraz kerdo û derheqê înan de cipersayîş ameyo destpêkerdiş. Zere de zulm û îşkence tepişteyan kenê. Verê îşkence kerdibî û didanê Îbrahîmî şikinabî. Her roje zîndanan de cenazeyî vejênê. Coka ma rehet nêkewenê ra. Ganî ma nê ra vajê vinde. Ganî komel hemverê nê de bêveng nêmano, veng vejo. Çira tutê ma binê îşkenceyî de yê? Amanc o yo ke cezaya tutanê înan bêra zêdekerdiş.”