Melîke Aydin

 

MANÎSA - Hatun Aysela 2 serrî yo Turgutluyê Manîsa de ciwîyena, da zanayîş ke ê karkerîyê mewsimî kenê, pêwa şert û mercê giranî ê bi nîjadperestî dir  yenê rî bi rî rû û vat: “Serra vîyarte de çadira birayê mi veşnayî. 4 çadirî bi eşyayan veşnayî. Hêzê înan qîm bikero do reyna wina bikerê. La qîm nêkeno. Seba ke ma zaf sixlet ê.”

 

Seba şert û mercê ekonomîye welatijî sey karkerê mewsimî şinê bajarê ke ci de şuxilênê û xeylêk binpêkaykerdişan dir yenê rî bi rî û cuya înan zehmet bena. Bi xususî welatijê kurdî bajarê metropolî ke sey  karkerê mewsîmî xebityenê, hemverê nîjadperestî de têkoşîn kenê. Hatun Aysel û keyeyê aye 20 serrî yo Mêrdîn ra sey karkerê mewsimî yenê Turgutluyê Manîsayî û çadiranê naylon û bereqeyan de ciwîyenê. Pêwa nê şertanê zehmetinan bi nîjadperetî dir zî yenê rî bi rî.

 

‘Nîmeyê serre binê bereqeyan de derbaz beno’

 

Hatune dîyar kena hamnanî bê dolaba qeşayî û makîneyê cilan dewam kenê û vat: “Tîya cuya ma çin a. Rewşa ma werte de ya. Ma cilan bi destan şonê. Mitbex çin o. Varan serê ma de vareno. Reyan marî yenê zereyê çadire. A rojan mar kewtibi binê doşekê tutan. Tutî vanê ma şêrê, la ma şêrê ça? Ma her ca de rastê bêtêduştî yenê. 1993ine de ma Qoser ra vejîyayî, ameyî bajarê rojawanî. Ma ameyî Menemenê Îzmîrî. Ma Mêrdîn de zî kar kerdêne. La dewlete her çî ma veşna. Ma tîya zî heqdestê xo baş nêgînê.”

 

Vatişê nefretî

 

Hatune dîyar kerd ke roja ameyîşê Îzmîrî de bi vatişê nefretî dir ameyê rî bi rî û vat: “Vatêne, ‘Şima zanê televîzyon çi yo? Mêrdîn de ceyran est o? Şima zanê engure çî ya? La her çî ma estbi. Her çî ma veşnayî. Hemverê Kurdan de nîjadperestî her ke şina zêde bena. Roşanan de verê ma ra derbaz benê û roşanê ma pîroz nêkenê. Ma sey dişminî vînenê. Ma înan rê  nêşuxliyî, gunayê înan bi ma nêno. Serra vîyarte de  4 çadirî veşnayî. Hêzê înan qîm bikero do reyna bikerê la nêeşkenê bikerê. Seba ke ma sixlet ê. Ma zî waştêne serrê herra xo de bê û herra xo biremnê.”