Marta Somek

 

STENBOL - Kaybaze Nur Surer derheqê Xelata Rumetî ya Seranserê Cuye ke girewte û dîyarîyê Dayîkê Şemeyî kerd de qisey kerd û vat: “Dayîkê Şemeyî erd ra yenê kaşkerdiş. Pêro derdê înan aqûbetê vînîbîyayeyan o. Sey Dayîkê Şemeyî zî vanê, ma do agêrê Meydanê Galatasarayî.”

 

Çalakîya roniştişê reya ewilî saete 12.00 de 27ê Gulana 1995ine de roja şemeyî, dimayê ke lajê Emîne Ocak, Hasan Ocak 21ê Adara 1995ine de ame destbendkerdiş, dimayê 58 rojan bi îşkence ame  qetilkerdiş û cenazeya ey Goristanê Bêkesan de ame nimitiş, ame destpêkerdiş. Dayîkê Şemeyî rixmê ke serê çalakîya înan ra demêkê derg derbaz bîyo, pêwa pêro tedayan û zordarîyan çalakîya xo dewam kenê. 

 

Waştişê înan esteyê tutanê înan ê

 

Çalakîya ewilî ra heta ewro pêwa pêro teda û destbendkerdişê Dayîkê Şemeyî fek Meydanê Galatasarayî vera nêdayî û waştişê înan o yo ke aqûbetê vînîbîyayeyan bêro perskerdiş, gumanbar û berpirsîyarî bêrê cezakerdiş, Tirkîya Peymana Mîyanneteweyî ya Pawitişê Kesê Ameyê Vînîkerdişî yê NYyî îmza bikero.

 

‘Zerrîya mi her tim bi dayîkan dir bi’

 

Hunermende Nur Surer ke xeylêk reyan waştişê Dayîkê Şemeyî bi rayapêroyî dayî eşnawitiş bi 27ê Hezîrane de 22yîn Festîvala Fîlman ya Tirkî ya Frankurtî ya Mîyanneteweyî de Xelata Rûmetî ya Seranserî Cuye girewte. Nur Surere xelata xo dîyarîyê Dayîkê Şemeyî ke roja ewilî de paştdayîşê xo dayîne, kerd. Nur Surere 6ê Tebaxe de Şubeyê ÎHDyî yê Stenbolî de bi temsîlkaranê Dayîkê Şemeyî dir ameye têhet û wina vat: “Zerrîya mi her tim verê şima de bî. Hêvîdar a, ma demêko nêzdî de reyna  agêrê Meydanê Galatasarayî. Heta ke vînîbîyayeyê peyînî bêrê vînayîş, ma uca de bê.” Nur Surer xelata xo da Dayîka Şemeyî Hanim Tosun ke mêrdeyê aye Fehmî Tosun destbendkerdişî de ame vînîkerdiş. Hanime zî da zanayîş ke xelate seba înan xeylêk xususî ya û wina vat: “Ez serê nameyê pêro dayîkan de gêna. Bi xususî zî seba dayîka Emîne gêna. Ez serê nameyê pêro dayîkan û pîyan de gêna. Baş o ke kesê ke sey to baş estê. Baş o ke hema kesê sey to estê. Ma do vînîbîyayeyan nêdê xovîrrakerdiş û hesabê înan pers bikerê.”

 

Kaybaze Nur Surere derheqê xelate de ajansê ma rê qisey kerd.

 

Dewaya xo bi înat kenê

 

Nur Surere wina vat: “Ewilî 5-6 kesî meydan de ameyî têhet û çalakî dayî destpêkerdiş. Ez zî dima ra tewr bîya. Heta destê mi ra ame ez tewr bîya. Pêwa  vînîbîyayîşê mi çinbi, ez dimayê serranê 94ine ra dima tewr bîya. Ma merdimê vînîbîyayeyan de xeylêk dayîkî û pîyê vînî kerdî. Tay dayîkî mendê. Tornê înan nika pîl bîyê. Dewaya vînîbîyayeyan bi înad dewam kena.”

 

‘Derdê dewlete o yo ke kes vînîbîyayîyan nêgêro’

 

Nur Surere dîyar kerd ke dayîkî çalakîyan de xeylêk rey rastê şîdetî ameyî û wina vat: “Vernîya xelate bigîrî, Almanya de mi çapemenîya komelî de vîna. Reyna dayîkan erd ra kaş kerdêne. Ganê mi deja. Derdê dewlete o yo ke kes vînîbîyayeyan nêgêro. Ez têkoşînê dayîkan bi erc vînena. Ez wazena verê înan de bî. Wa dayîkî her tim bêrê vînayîş. Seba nê mi xelata xo diyarî Dayîkê Şemeyî kerd.”

 

'Do têkoşîn dewam bikero'

 

Nur Surere tewr peyîn vat do tim kîşta dayîkan de ca bigîro û wina qedêna: “Sey Dayîkê Şemeyî vanê; ma do reyna agêrê ê meydanan û do têkoşîn dewam bikero.”