Rojda Aydin

 

AMED - Mîtîngê HDPyî yê “Çareserî ma yê, şer û îşxalkerdişî rê ney’ cinî mesajê xo yê derheqê tecrîdî de bi zelalî ardî ziwan û vatî: "Tena rayîrê çareseriya problemê kurdî bi azadîya Abdullah Ocalanî mumkin o. Seba azadîye zî ganî têkoşînêkê hempar bêro dayîş.”

 

6ê têbaxe de Partîya Demokratîke ya Şaran (HDP) bi sloganê, “Çareserî ma yê, şer û îşxalkerdişî rê ney” Meydanê Îstasyonî yê Amedî de mîtîngêk organîze kerd. Beşdarwanê mîtîngî tecrîdê hemverê Rayberê PKKyî Abdullah Ocalanî şermezar kerdî û azadîya fizîkî waştî. Cinîyê ke tewrê mîtîngî bî, hîs û fehmê xo ardî ziwan.

 

‘Hemverê tecrîdî de wurzê serê lingan’

 

Heznigul Kavak, da zanayîş ke seba cuyêka azade ganî tecrît bêro wedaritiş û vat: “Tecrîd ewro tena hemverê Serekî de nêyo, no tecrîd pêro zîndanan rê derbazdar o. Ewro xeylêk tepişteyî seba zulmî grevê vêşanîye de yê. Bi serran o ma waştişê azadî, aştî û têduştî kenê. Dimayê ke tecrît giran bi, Kurdistan de şer zî kûr bi. Ma nêwazenê ne gerîla û ne zî leşkerî dinyaya xo bibedelnê. Ma êdî cuyêka aştîyane wazenê. Wa no şer peynî bibo. Gelo derdê hukmatî çi yo? Çira nê zulmî ma rê keno? Eke tecrît wurzo, serek eşkeno nê şerî peynî bikero. Tena Serek eşkeno çareserî bîyaro. Ewro xeylêk tepişteyê nêweşî estê û Aysel Tugluke zî mîyan de ya. Seba şikinayîşê  tecrîdî ganî sere de dayîkî, şarê kurdî wurzê serê lingan.”

 

‘Wa rayîrê Îmraliyî abibo’ 

 

Lamia Ayaz zî vat, bi serran o pêvînayîş bi Abdullah Ocalanî dir nêno kerdiş û rewşa bîyaye ra bi qesawet ê û wina vat: “Ma do tecrîd bişikinê û Serek azad bikerê. Seke ma her rey vanê, biciwîyo kurd û Kurdistan. Dewleta tirke kurdan ra çi wazena? Ma  mitîng de venga dewlete kerd ke nê tecrîdî bişikinê. Merdimo ke misilman bo nê tecrîdê giran û nê şerî nêkerdêne. Tena tepişteyanê ma vera nêdanê. No çî nêno qebulkerdiş. Ma weşîya Serekî ra biqesawet ê. Heta Serek azad nêbo, ma zî nêvindenê. Ewro no tecrît serê Şarê Kurdî de yeno kerdiş. Dewlete bi tecrîdî zulm bi ma kena. Her çar parçeyê Kurdistanî de ewro şerêkê xidar est o. Wa rayîrê Îmraliyî abibo. Wa avûkat û keyeyî şêrê pêvînayîş.”

 

‘Azadî bi azadîya Serekî mumkin a’

 

Gurbet Aytar zî azadîya Abdullah Ocalanî waşt û nê çî vat: "Hukmat bi girankerdişê tecrîdî dir zulm bi ma keno. Wa no zulm peynî bibo. Ma tena azadîya Serekê xo wazenê. Ma do çar hetê Kurdistanî de serbikewê û tecrîd bişikinê. Ganî ewro şarê ma seba Serekî vejîyo meydanan û xo ver bidê. Ma şer û kiştiş nêwazenê. Ma cuyêka azad û têduşte wazenê. No zî bi Serekî dir mumkin o. Wa berê Îmraliyî abikerê û avûkatî şêrê pêvînayîş. Ma bi xêrê Serekî ziwan, nasname û bîyayîşê xo nas kerd.”

 

‘Ganî pêvînayîş bêro kerdiş' 

 

Rabîa Ataş zî dîyar kerd ke tecrîdê serê Abdullah Ocalanî bi temamê serê 40 mîlyonî kurdan de yeno kerdiş û vat: “Eke tecrîdê serê Serekî wuştêne, do serê tutanê ma ra zî biwuştêne. Ewro bi seyan tepişteyê nêweşî estê. Serekkomar qet xo ra fedî nêkeno ke ê tepişteyê nêweşan mîyanê çar dêsan de verdayê. Destûr nêdenê ke avûkat û keyeyî bi Serekî dir pêvînayîş bikerê. Bi mengan o, ma zanayîş nêgînê. Eke çîyêkê bi Serekî bibo, do pêro dinya wurzo serê lingan. Bi serran o hemverê kurdan de zulmêk est o. Sey demê verî, ma reyna vejîyê meydanan û vengê xo berz bikerê. Eke ma mirenê zî wa ma bimirê. Tutê ma her roje mirenê. Mergî ra wetayêr est o?”

 

‘Îmraliyî de bêhuqûqîyêkê pîl est o' 

 

Necîme Yaşar zî wina bale ant serê tecrîdî: "Destûr nêno dayîş ke bi Serekî dir pêvînayîş bêro kerdiş. Heqê Serekî zî est o ke bi keye û avûkatanê xo dir pêvînayîş bikero. Ma bawer ê ke eke tecrît wurzo û Serek azad bibo, do azadîyêke bêro nê welatî. Eke Serek bêro veradayîş, problemê kurdî zî safî bibo. No tecrît ewro tesîr serê pêro zîndanan û Şarê Kurdî de keno. Bêvengî merg a. Wa Şarê Kurdî destê xo bidê yewbînan û nê tecrîdî bişikinê. Wa pêro kesî hemverê tecrîdî wurzê serê lingan.”