COLEMÊRG - Cevahîr Agralila OHDyije da zanayîş ke zîndanan de binpaykerdişê heqan ê giranî yenê ciwîyayîş û sebebê mergê bigumanî zî polîtîkaya teda û binpaykerdişê zîndanan o.

 

Zîndanan de binpaykerdişê heqan her ke şinê giran benê û tewr zêde tepişteyê nêweşî nê ra tesîr benê. Goreyê dayeyê menga Nîsane ke ÎHDyî weşana, 651 ci ra giran bi pêroyî hezar û 517 tepişteyê nêweşî estê. Sewbîna tepişteyê nêweşî yê rewşa înan zî giran a bi raporê ATKyî nênê tahlîyekerdiş. Keyeyan nê ser de seba tepişteyê nêweşî bêrê tahlîyekerdiş Amed, Stenbol û Îzmîr de Nobeta Edaletî dayî destpêkerdiş. Bêvengîya hemverê çalakîyan dewam kena.

 

Endama Şubeyê Komeleya Huqûqnasan ê seba Azadîye (OHD) avûkate Cevahîr Agrali derheqê nêweşan de qisey kerd.

 

‘Sebebê merdişan teda yê’

 

Cevahîre dîyar kerd ke binpaykerdişê heqan ê zîndanan bi pandemîyî dir zêde bîyê, heqê weşîye ameyo astengkerdiş, nê prosesî de dermankerdişê tepişteyan asteng bîyo. Cevahîre wina vat: “Sebebê merdişê zîndanan teda û astengkerdişê heqê weşîye û cuye yo. Merdişê bigumanî de xeylê nêweşî dinyaya xo bedelnenê. Sewbîna xeylê tepişteyan rê zî  întîxar ferz kenê.”

 

‘Bi zorî cigêrayîşê zitî yeno kerdiş’

 

Cevahîre eynî wextî de dîyar kerd ke tepişteyê nêweşî bi kelemçe yenê dermankerdiş û no hemverê huqûqî yo û wina dewam kerd: “Seba ke tepişteyî dermankerdişê bi kelemçe nêwazenê, hetê weşîye de zî problemê cidî yenê ciwîyayîş. Cigêrayîşê zitî tepişteyan rê ferz kenê. Her tim erzenê serê qawişan. Înan terkê mergî kenê. Tedayê psîkolojîkî kenê.”

 

‘Wijdanan birîndar kerdî’

 

Cevahîre vat, ganî tepişteyê nêweşî û emrê înan derbaz bîyê bêrê dermankerdiş û vernîya tahlîyeyê înan bêro akerdiş û vat: “Tepişteyê nêweşî giran yê ke emrê înan aver şîyo û nênê veradayîş; Mehmet Emîn Ozkan, Makbûle Ozer, Hadî Ozer û Aysel Tugluke yê. Nê tepişteyî nêeşkenê lazimîyê xo bi ca bîyarê. Mehmet Emîn Ozkan nêeşkeno rayîra şêro. Pêwa nê bi kelemçe benê nêwaşxane. Nê dîmenan wijdanan birîndar kerd. Tepişteyî hucre de manenê, weşîya înan xirab bena. Xeylê merdişê biguman hucreyê yew kesî de yenê ciwîyayîş. Tepişteyî seba şertê hucreyî întîxar kenê. Ver bi merdişan de benê. Ganî nê binpaykerdişê heqan lezabez werte ra bêrê wedaritiş.”