RIHA - Çalakîya "Nobeta Edaletî" ya Keyeyê Şenyaşarî dewam kena û keyeyî ewro bale ant serê astengîyê vizêrî û vat: “Astengkerdişê ma yê dekewtişê edlîyeyî çareserî nêyo, ma fekê nê berî ra nêşinê.”

 

Keyeyê Şenyaşarî çalakîya "Nobeta Edaletî" 9ê Adara 2021î ra verê Edliyeyê Rihayî dayî destpêkerdiş, roja 519ine de dewam kena. Dayîke û lajê aye serê sibayî keyeyê xo yê ke qezaya Pirsûsî de yo, ameyî verê Edliyeyî û dest bi nobete kerdî. 

 

Keyeyî ke demêko derg o verîsîya baxçeyê edlîye de  nobete girewtêne, vizêrî serê fermanê Walîyê Rihayî ra baxçe ra ameyî vetiş. Emîne û Ferît Şenyaşar ke ameyê verê edliyeyî dovîzê, “Seba edaletî mudaxaleyê 519ine nêeşkeno ma vindarno” wedarnayî û verê bariyeran de dest bi nobete kerdî. 

 

Keyeyî serê hesabê xo yê Twitterî de Walîyê Rihayî û Midûrîyê Emniyetî etîket kerd û wina vat: “Zerrîya dayîke bi edalet û merhamet a. Nêeşkena nêheqî û bêhuqûqî qebûl bikera û şêra keyeyê xo. Astengkerdişê ma yê dekewtişê edlîyeyî çareserî nêyo. Heta ke edalet nêro, ma fekê nê berî ra nêşinê.”