Şehrîban Aslan

 

AMED - Cinîyan qerarê Dadgeha Berzî ya derheqê Peymana Stenbolî de daya, ercnayî û vatî: “Hûmara cinîyê ke stargehan de manenê 243 hezar û 282 ya. No zî mojneno ke, cinîyî mergî ra remenê û têkoşînê cuye danê. Feshkerdişê peymane meşrûkerdişê şîdetê serê cinîyan mojneno.”

 

Serekomarê AKPyî Tayyîp Erdogan 20ê Adara 221î de Peymana Stenbolî fesh kerd û dimayê nê bi desan rêxistinê cinîyan û komelê sivîlî û baroyan seba vindarnayîşê qerarî muracatê Şûraya Dewlete kerdî. Muracat, 28ê Nîsane û 7-14 û 23ê Hezîrane de bi roniştiş ame vînayîş. Dimayê dewayan 10ine Daîreyê Şûraya Dewlete 19ê Temmuze de 38 rîpelî weşana û vat, ‘qerarê serekkomarî nêeşkeno bêro muhakemekerdiş’ û qerarê antişê Peymana Stenbolî tesdîq kerd. Nê ser de cinîyî her çar hetê Tirkîya ra dekewtê meydanan û mesajê wayîrvejîyayîşê Peymane dayî.

 

Endama Heyetê Îdarekarîya Baroyê Amedî Hatîce Demîr û Awankerdoxa Komeleya Jiyanî yê Cinîyan ê Riha Sevînç Ozîpek qerar ercnayî.

 

Hatîce da zanayîş, Peymana Stenbolî ke Peymanêke Konseya Ewropayî cinîyan hemverê her tewir şîdetî pawena û her tewir bêtêduştîya hemverê cinî werte ra wedarneno û vat: “Hemkarîyêke mîyanneteweyî yê hemverê şîdetê cinî teşwîq keno. Seba nê zî seba cuya cinîyan xeylêk muhîm o.”

 

'Hukmêko xoser çin o’

 

Hatîce vat, qerarê feshkerdişê peymane yeno manaya ke cinî hemverê şîdetî bêpawitiş yenê verdayîş û şîdet yeno meşrûkerdiş û wina vat: “Ma derheqê feshkerdişî de Dadgeha Berzî ra dewa akerd. La çi heyf, qerar ma şaş nêverda. Pêwa pêro hewldayîşî no qerar ame dayîş. Bi nê qerarî ame mojnayîş ke dewleta huqûqî werte ra ameya wedaritiş. No qerar eynî wextî de mojneno ke pêro  peymanê heqê merdiman yê mîyanneteweyî kewenê binê rîskî. Ma do hemverê qerarî şêrê temyizî. Ma tîya ra netîceyêke nêgîrê, ma do berê DDB û DMMEyî.”

 

‘Qeraro ke ameyo dayîş binpaykerdiş o’

 

Awankerdoxa Komeleya Jiyanî yê Cinîyan ê Rihayî Sevînç Ozîpek zî dîyar kerd ke komeleya înan seba peymane têkoşînêkê pîlî dayê û wina vat: “No qerar cesaret dayo kiştox û tecawuzkeran. Ma zanê ke Peymana Stenbolî seba cinîyan destkewtişêkê pîl o. Netîceyê têkoşînê pîlî de ameya bidestkerdiş. Yanî Peymanêke heqê merdimayî ya mîyanneteweyî ya. No qerar hemverê huqûqê heqê merdiman û destûrê bingehîn o.”

 

‘Qerar siyasî yo’

 

Sevînçe tewr peyîn wina vat: “Hûmara cinîyê ke  stargehan de manenê, 243 hezar û 282 ya. No zî cinîyê ke mergî ra remenê û têkoşînê cuye danê mojneno ra. Feshkerdişê peymane meşrûkerdişê şîdetê serê cinîyan mojneno ra. Qerarê feshkerdişî seba ma çin o. Ma cinîyî nê qerarî nas nêkenê û ma do heta peynî seba peymane têkoşîn bikerê.”