MERKEZÊ XEBERAN - Rojnamegere Denîz Firate serrgêra 8ine de Wargehê Multecîyan ê Mexmûrî de ameye yadkerdiş.

 

Rojnamegere Denîz Firate ke serra 2014ine hêrişê çeteyanê DAIŞî ke eşt serê Wargehê Multecîyan ê Şehîd Rustem Cûdî (Mexmûr) de dinyaya xo bedelnaye, serrgêra jiyana 8ine de Sazgehê Keyeyê Şehîdan ê Wargehê Mexmûrî de ameye yadkerdiş. Merasîm de keyeyê Denîz Firate, embazê aye yê rojnamegerî û desan welatijê wargehe amede bî.

 

Vernîya ke merasîm dest pêbikero, şexsê Şehîd Denîz Firate de seba vîrardişê temamê şehîdanê çapemeniya azade û têkoşînê azadîye yê Kurdistanî de deqeyêke rêze ameye girewtiş.

 

Dimayê rêzgirewtişî serê nameyê embazanê aye yê rojnamegerî, rojnemegere Berîvan Tûnç qisey kerd û vat: "Şehîd Denîze emrê xo yê qij de tewrê karî bî û heta resa sewîyeya şehadetî, seba azadîya Şarê Kurdî her tim şuxulya. Demo ke Mexmûr de kar kerdêne, seba pêro ciwan û tutanê Mexmûrî bî çimeyêke bifeyde. Şehîd Denîze gama cuya xo de seba ke dejê Şarê Kurdî bi raya pêroyî dir pare kerd,  her tim têkoşîn kerd. Hêrişê DAIŞî yê serê wargehê Mexmûrî bi rayapêroyî dir pare kerd û nê oxirî de şehîd bî. Ma şexsê Şehîd Denîze, Şehîd Nûjîyane û pêro şehîdanê çapemenîya azad de hêrişê serê rojnamegeran şermezar kenê. Ma do heta peynî pey dewaya Şehîd Denîze de bê."

 

Dima ra dayîka Denîze, Sultan Yildiztan zî qisey kerd û vat: "Şexsê Şehîd Denîze de şehîdê çapemenîya azade pêrûne vîr ana. Sey keye ma do tim pey dewaya Rayber Apo û şehîdan de bê."

 

Merasîmê vîrardişî bi slogananê "Biciwîyo Serek Apo û şehîdî nêmirenê" peynî bî.