WAN - Yê ke tewr zêde krîzê ekonomî û zamo ke roje bi roje yeno kerdiş ra tesîr benê, cinî yê. Cinîyê Wanijî şuxulênê, karê ke kenê cîya bê zî problemê înan ê hempar meaşo tay o.

 

Krîzê ekonomî seba polîtîkayê AKP û MHPyî roje bi roje tewr giran beno. Lazimîyê sereyîn yê werdî ra  heta cil û belg û kîra ra welatijî êdî nêeşkenê tu çîyêk bikerê. Seba krîzî bêguman yê tewr zêde tesîr benê cinî yê.

 

Wan de cinîyê ke terzîtî kenê, lokantayan de şuxulênê û tutun roşenê, krîzê ekonomîye ercnayî. Cinîyê ke karê cîya kenê, problemê înan hempar ê û dîyar kenê ke cinî pereyê ke kêm gênê.

 

‘Qezencê mi şino fature û kîra’

 

Seyran Elçî 15 serrî yo terzîtî kena û vat, 5 serrî yo nêeşkena şîyaye xo bida û wina vat: “Wayê û birayê  mi karê mewsimî kenê. Seba nê zî debara keyeyî ez kena. Ez ewnîyena 7 kesî ra. Wayê û birayê mi bi ameyîşê hamnanî dir kar û barê genimî, rez û baxçe û vaşî yê dewe kenê. Reyan seba vayîya benzînî nêeşkenê her tim şêrê. Ez zî qezencê xo dana kîraya kargerîyî, fatureyê ceyran û şîyayeyê mutbaxî.”

 

‘Ez keda ke dana heqê xo tam nêgêna’

 

Seyrane dewam de wina vat: “Ez tena xebityena. Karê ke ez kena zî çend sewîyeyê ci estê. Ez xeylêk rey 24 saetan şuxulêna. La qezencêkê baş çin o. Nika makîneyê mi xira bîyo. Ez bidî viraştiş, 500 TL ganî bidî. Seba nê pereyî zî ganî hîrê fîstanan biderzînî. Verê ma derzenî bi 3 TL girewtêne. Nika 20 TL ya. Fermuare 50 kuruşî bî, nika bîya 4 TL. Ez hemverê keda xo nêgêna.”

 

‘Ez hewl dana debara xo bikerî’

 

Munevver Korkaç ke seba debara xo bikero, tutun roşena û vana ke roje de 80 lîra qezenc kena û bi nê pereyî zî hêvî kena ke şêra unîversîte. Munevvere vat, 7 wayê û bira yê û wina ercna: “Pîyê mi tena înşatan de şuxulêno. Bi serrêke yo ez tutun roşena. Serê siba yena şan de vejêna. Ez nêeşkena şêrî dersxane. Zaf vay ê. Nika dersxaneyî tewr erjan 10 hezarî yê. Şîyayîşê rayîrî û lazimîyê roje zî cîya. Seba nê ez hewl dana pere kom bikerî û şêrî dersxane.”

 

‘Pere kêm danê’

 

Tugba Yokuş zî vat xeylê karan de şuxulyaya û tewr peyîn lokantayêke de dest bi şuxulî kerda, aşme ra zî  2 hezar gêna. Tugba bi nê vatişan rewşa xo vat: “Ez serê siba yena kar, werd amade kena. Ewnîyena tezgah ra. Firaqan şûna. Hema hema heme karê dikanî ez kena. Pereyê ke danê xeylêk kêmî yo. Tutêk/e mi esto/esta. Ez seba ey/aye serê lingan de ya.”