Rozerîn Gultekîn

 

STENBOL - Hemsereka DADî Kadrîye Dogan da zanayîş ke hêrişê vera keyeyê cemî yê Anqarayî organîzekerde yê û vat: “Ez venga pêro hetê ke azadî, têduştî wazenê seba cuyêka têduşte têkoşîn bikerê.”

 

Anqara de roja ewilî yê Roceyê Muharremî de  hemverê Cemxaneyê Fatma Ana, Cemxaneyê Şah-i Merdan, Komeleya Dewa Gokçebelî û Weqfa Elewî-Bektaşî ya Tirkmenan de 31ê Temmuze de bi hawayêke hemdem hêriş ame kerdiş. Eşkerayîye de ame vatiş ke hêrişî hetê kesêkê ra ameyê kerdiş û hêzê pey hêrişî ameyî nimitiş.

 

Hemsereka Komeleya Elewîyan a Demokratîke (DAD) Kadrîye Dogan, derheqê hêrişê ke bi hawayêke hemdem hemverê cemxaneyan de ameyê kerdiş de qisey kerd û hemverê hêrişan de venga  têkoşînê hempar kerd.

 

Kadrîye vat, hêrişê hemverê Elewîyan û cemxaneyan roje bi roje zêde benê û nê hêrişê yewin nîyê û wina vat: “Tirkîya de prosesêkê bi peroblem est o û krîzê ekonomîye est o. Bi nê hêrişan hewl danê dîqetê komelî bidê hetêko bîn. Wazenê çîyê ke yenê ciwîyayîş, komelî rê bidê xovîrrakerdiş. Nê zî serê cematê Elewîyan de kenê.”

 

‘Hêrişêkê organîzekerde yo’

 

Kadrîye dîyar kerd ke goreyê agahîyê ke emnîyetî dayê, gumanbar Îzmîr ra ameyo û gumanbar seba ke hêrişî meşrû bikero îfadeyê tewir bi tewir dayo û vat:“Hêriş organîzkerdebi. Îfadeyê tewir bi tewir dayo. No nêzdîbîyayîşêkê tehluke yo. Gumanbar û hêzê pey ey yenê pawitiş û ma seba na rewşe qesawet de yê. Serebût wina asan nîyo. Ganî hêzê pey gumanbarî bêrê vetiş û komel rehet bikero. Ganî bêro fikirnayîş ke nê hêrişî do bibê sebebê çi. Verê ra heta nika refleksê dewlete her tim wina bi. Hewl danê ke serebûtan bidê xovîrrakerdiş û hêzê pey serebûtî  deşîfre nêkerê.”

 

Hesreta têduştî û azadîye

 

Kadrîye vat, bingehê hêrişanê hemverê Elewîyan de fikro yewperest est o û ewnîyayîşê yew ziwan, yew dîn û yew nîjad nê hêrişan wey keno û vat, ê hesreta azadî û têduştîye de yê. Kadrîye dewam de wina qal kerd: “Elewîyî seba waştişanê xo bi hawayêke rêxistinkerde anê ziwan, rastê hêrişan yenê. Qirkerdişê Madimak, Mereş û Sêwasî sî seba nê ameyî kerdiş. Ewro zî bi eynî zîhnîyetî têgêrenê. Tirkîya de tu hêrişî tesaduf nîyê.”

 

Venga têkoşînî

 

Kadriye tewr peyîn dîqet ant serê muhîmîyê têkoşînê hempar û wina qedêna: “Wexto ke Elewîyî dua kenê; kerra, xoza, cîranan rê zî dua kenê û dima ra xo rê kenê. Ma komelêkê azad wazenê. Ez venga têkoşînê hempar pêro kesan rê kena. Seba cuyêka têduşte û azade ganî ma pîya têkoşîn bikerê.”