Medya Uren

 

MÊRDÎN - Hemsereka HDPyî ya bajarê Mêrdînî Bêrîvan Bahçeçî derheqê mîtîngê HDPyî yê 6ê Tebaxe de, do Amed de bêro kerdiş ser o venga şarê Mêrdînî û mintiqa kerd. Bêrîvane vat, hemverê tecrîd, kaos û polîtîkayê bêçaereserîye bêrê ma hêzê xo û vengê xo bikerê yew. Lazim o ma helwestê xo hemverê şerî de mojnê ra û vajê, êdî bes o.

 

Partîya Demokratîke ya Şaran (HDP) bi sloganê “Çareserî Ma yê, Şer û Kolonyalîstî Rê Nê!” 6ê Tebaxe de meydanê Îstasyonî yê Amedî de mîtîng organîze bikero. Seba amadekarîya mîtîngî sere de Amed û mintiqa de xebatî dewam kenê. Rêxistina HDPyî ya Mêrdînî zî bi beşdarbîyayîşê parlementeran dir bi rojane kuçe bi kuçe, dewe bi dewe gêrenê û venga beşdarbîyayîşê mîtîngî kenê. Hemsereka HDPyî ya bajarê Mêrdînî Bêrîvan Bahçecî derheqê xebatanêmmîtîngî de parekerdiş kerd.

 

‘Îqtidarêkê bi şer xo mird keno, vernîya ma de est o’

 

Bêrîvane sere de babeta mîtîngî ercna û vat: “Îqtîdaro bîyaye, bingehê xo serê şer û kaosan awan kerd û nika zî seba xo serê lingan de verdo, nê polîtîkayanê xo yê şerî dano dewamkerdiş. Şero bîyaye bingehê xo tecrîd ra gêno û bi hêrişê teberê sînorî û serê şarî dir yeno hîrakerdiş. Îmraliyî de tecrîd yeno kerdiş, serê tepişteyan de binpaykerdişê heqan dewam kenê. Sîyasetmedarê muxalifî hedef yenê ramojnayîş û hêrişê polîtîkî yê xususî serê şarî de yenê kerdiş. Teberê sînorî de zî hêrişêk xidar dewam keno. Îqtîdar  butçeyê xo yê zêdeyêr şerî rê visneno, beno sebebê krîzê ekonomî ke her ke şino kûr beno. Nê heme zî bingehê xo tecrîdî ra gênê û yeno hîrakerdiş.”

 

‘Lazim o çi bêro kerdiş?’

 

Bêrîvane da zanayîş ke krîzê Tirkîya dewam keno û vat: “Bi xususî lazim o ma hêrişê ke teberê sînorî de yenê kerdiş, biercnê. Seba ke sivîlî yenê qetilkerdiş û sûcê şerî yenê kerdiş. Seba ke nê bi ca nêrê ganî ma se bikerê? Bêguman ganî sere de tecrîd bêro şikinayîş. Ganî gamê prosesê aştîye bêrê eştiş. Bi xususî pêvînayîşê bi Birêz Abdullah Ocalanî dir bi ca bêrê. Bi pêvînayîşan dir bêguman do seba her beşê komelî prosesêkê demokratîke bo. Lazim o ma derûdorê HDPyî, derûdorê sîyasetê demokratîke de xo rêxistin bikerê. Ganî ma bi çalakîyan û girseyan dir hêzê xo ramojnê.”

 

‘Seba demokrasî bêrê mîtîng’

 

Bêrîvane tewr peyîn wina vat: “Sey rêxistina HDPyî ya Mêrdînî, seba mîtîng bêro kerdiş ma xebatê xo bi rojan o dayo destpêkerdiş. Bi parlamenter û rêxistina xo dir ma dewe bi dewe, ware bi ware gêrenê. Ma şarî dir kewenê mîyanê têkilî. Ma muhîmîyê babete înan rê vanê û înan dawetê mîtîngî kenê. Hemverê şerî, hemverê îşxalkerdişî ma vanê ke çareserî HDP yo. Çareserî ma yê. Bêrê ma seba çareserî gamêke bierzê. Wa şarê ma yê Mêrdînî, heme rêxistin û sazgehê sivîlî, sewbîna kesê ke pey demokrasî de yê hêzê ma rê bibê hêz. Bêrê ma meydanê Îstayonî yê Amedî de kom bibê.”