AMED - Cinîyê ke Peyasê Amedî de esnafî kenê, dîyar kerdî ke seba kargehanê xo serê lingan de verdê, muracatê kredîyan kerdê û bi zor peynîya menge anê.

 

Seba krîzê ekonomîye, enflasyon her ke şino zêde beno û pereyê tirkî her ke şino ercê xo vînî keno. Seba nê zî şert û mercê cuye her ke şino zehmet beno. Cinîyê ke tewr zêde krîzî ra bi tesîr benê, dîyar kenê ke ê mecbûr ê têkoşîn bikerê.

 

Taxa Gazîlerê Peyasî yê Amedî de cinîyê ke esnafî kenê, derheqê polîtîkayê ekonomîye yê hukmatî û krîzê ekonomî de qisey kerdî.

 

‘Ez karê ke kena ci ra kêfweş nêya’

 

Dîlber Îlana ke bufeyêkê qij xebitnena, da zanayîş ke aye karê ke kena kêfweş nîya û wina vat: “Seba cinîyan her tewir kar zehmet o. Cinî hem hetê derûdorî ra û hem zî hetê camêrdan ra zehmetîyan ancenê. Her kesî vat, ‘ti do mengêke yan zî hîrê, çar mengan dewam bikerê.’ La nê kerdî xo vîr ra ke ma hem dayîk ê, hem zî cinî yê û hem zî bi hêz ê. Şar seba mi çi fikrîyeno xemê mi nêyo.”

 

‘Ma bi krediyan serê lingan de yê’

 

Dîlbere dîyar kerd ke nika krîzêkê pîl ê ekonomîye est o û vat: "Heta nika mi dewlete ra hetkarîyêkê nêwaşt. Yê derûdorê mi zî hetkarîyêke wina nêwaşt û ne zî dewlete hetkarîyêke wina daya. Labelê seba dikanê xo panêdî, mi banka ra kredî girewt û bi nê rengî ez hewl dana ke serê lingan de bimanî."

 

‘Ma pandemî de 3 mengan kepenk girewt' 

 

Cinîya bi nameyê Mehtape ke dikanê aye yê cil û belgê adetî est o û vat: “Karê ma derheqê şahî û dawetan de yo. Ma karê xo ra hes kenê. Verê mi nê karî nêkerdêne. Dimayê ke ez zewicyaya mi bi mêrdeyê xo dir nê karî kerd. Bêguman her karêkê zor û zehmetîyê ci est o. Pandemî de ma hîrê mengî kepenk girewt. Goreyê serra ma ya ewilî, serra ma ya diyîn zaf weş derbaz bî. La pandemî de ma xeylêk kewtî. Muşterî kêmî bî. Ma zirar kerd. Dewlete bi tu hawayî paştdayîş nêda ma. La nika krîzê ekonomî tesîrêkê pîl serê ma de keno.”

 

‘Ma bi zor serê menge anê’

 

Salîme Dag ke mexazeyêke de werd amade kena, wina qal kerd: “Roja meaş yeno ez şina ATMyî û heta şina keye pêro pere qedêno. Ma hetê ekonomî de mîyanê cehenemî de ciwîyenê. Seba şertê ekonomîye, merdimî herre û wesayîtê xo roşenê. Perwerde xora qedîya yo. Pêro ciwanî betal ê. Bêguman cuye seba cinîyan tewr zêde zehmet a. Ma mecbûr ê ke têkoşîn bikerê. Ma bi zor peynîya menge anê. Ma mecbûr ê ke deyn bikerê.”