AMED - Seba Baroyê Amedî bi tehdîdan dir rî bi rî mend DFG şi serdayîşê baroyî û mesajê paştdayîşî da.

 

Baroyê Amedî seba ke Qetlîamê Zaxoyî yê 20ê Temmuze de hetê Tirkîya ra amebi kerdiş û 9 sivîlan dinyaya xo bedelnabî, şermezar kerdibi hedef amebi girewtiş. Dimayê hedef mojnayîşî, derheqê îdarekarîyê Baroyî de cipersayîş ame destpêkerdiş. Komeleya Rojnamegeranê Dîcle Firatî (DFG) bi amancê paştdayîşî serdayîşê îdarekarîyê Baroyî kerd. Hemseraka DFGyî Dîcle Muftuoglu û îdarekarê komeleyî hetê îdarekarê Baroyî Mehdî Ozdemîr û Serdar Ozerî ra ameyî pêşwazîkerdiş. 

 

'Ma hedefmojnayîşê baroyî şermezar kenê' 

 

Hemsereka DFGyî Dîcle serdayîşî de qisey kerd û vat, ê paştdayîş danê Baroyê Amedî. Dîcle, Tahîr Elçî ke serekê baroyî bi û bi tehdîdan dir rî bi rî mend, dima ra hedef ame mojnayîş û heta ke hêrişê Sûrî de ame qetilkerdiş ard vîr û nika zî yeno waştiş ke nê tehdîdî dewam bikerê. Dîcle dîyar kerd ke Baroyê Amedî waşt qetlîamê Zaxoyî bêro roşnkerdiş û na babete de gamêke muhîm eşt o. Dîcle ard ziwan ke  Baroyê Amedî helwestêk bi nimûne mojnayo rêxistinê sivîl û vat: "Baroyê Amedî helwestêk bi rûmet mojna û reyna sey her tim bi mîsyonê xo yê tarîxî wuşt. Ma hedefmojnayîşê baroyî şermezar kenê û ma dîyar kenê ke ma do tim paştdayîşê baroyî de bê.”

 

'Do tehdîd û tedayî sernêkewê’

 

Îdarekarê Baroyî Mehdî Ozdemîr zî vat, înan bi eşkerayîya vila kerdî, mîsyonê xo yê tarîxî bi ca ardî û waştî bi tehdîd û cipersayîşê Baroyê Amedî bipelçiqnê la do teda û tehdîdî sernêkewê.