Melîke Aydin

 

ÎZMÎR - Cinîyan dîyar kerdî ke Wezaretê Karê Zereyî  rêziknameyê ke sazgahê Elewîyan rê şawito, yarîya xo  bi Elewîyan keno û vatî: "Bi hêrişê hemdemî yê hemverê sazgehê elewîyan ê dimayê rêziknameyî de pêrodayîşêkê komelî kenê amanc. Hemverê nê de têkoşînêkê hempar muhîm o.”

 

Bi hawayêke hemdem Anqara de roja ewilî yê Roceyê Muharremî de hemverê Cemeviya Ana Fatma, Cemeviya Şah-ı Merdan, Komeleya Gokçebel Koy û Weqfa Elewî Bektaşî yê Turkmenî de hêrişî ameyî kerdiş. Elewiyê ke hetê îqtîdarî ra bawerîya înan çin yena hesibnayîş, bi se serran o bi teda, qirkerdiş û asîmîlasyonî rî bi rî yenê verdayîş.

 

Cinîyê Elewîyî reaksîyon vera hêrişan dayî

 

Berpirsîyara Federasyonê Komeleyê Alevî Bektaşî yê Mintiqaya Egeyî, Gulbahar Kaplan da zanayîş ke Wezaretê Karê Zereyî rêziknameyê ke şawito vato ke,  "Ê do nêzdîyê cemeviyan bê û veng nêverdê.”  Gulbahare da zanayîş, çîyê ke wina yeno manaya çinhesibnayîşê rêxistinanê Elewîyan û vat bi nê yarîya xo bi Elewîyan kenê. Gulbahare wina qal kerd: "Her çiqas ê biwazê ma çin bikerê zî, ma do têkoşîn bikerê. Kamî nê hêrişî kerdo ma baş zanê. Ma bi nê kayan û provakasyonan nênê xapênayîş. Ma do têkoşînê xo yê  rêxistinkerde dewam bikerê. Nê hêrişî tena hemverê ma nêyê, hemverê pêro canê ma yê ke kîşte ma de yê. Ma hêvî kenê ke hem bi rêxistine û sazgeh kîşte têkoşînê ma yê heqdar de bê.”

 

'Nê hêrişî bi serran o bi hawayêke organîzekerde dewam kenê’

 

Endama Komeleyê Elewîyî yê Demokratîke (DAD), Yeter Erol da zanayîş ke îqtîdar kîn û nefret pîl keno û wina vat: "Siyasetmedarî bi ziwanêko baş qisey nêkenê. Demo ke ê wina kenê, komel zî hêriş keno. Nê hêrişî bi serran o bi hawayêke organîzekerde dewam kenê. Tewr zêde zî menga roceyî de nê hêrişî yenê kerdiş. Ganî ziwanê nefretî ra dûr bêro vindertiş.”

 

'Tu heqê înan çin o bawerîya ma perçe bikerê'

 

Welatija Elewîye Gulşen Bag dîyar kerd ke înan serê  medyaya dîjîtale de hêriş eşnawito û vat: "Problemê Elewîyan pêro kesî eleqedar keno. Vatişê hemverê Elewiyan nefret tewr zêde kûr keno. Sunni zêde paştdayîş nêdanê ma. Eke paştdayîş zêde bibo, do kes cesaret nêkero hêriş bikero. Labelê vanê, 'cîranê mi, mi eleqedar nêkenê'. Eke tu zulmê serê mi de bêveng bê do siba dore bêro to. Ma welatijê nê welatî yê, ma dizdî û nêheqî nêkerdo. O wext ma zî şêrê hêrişê camîyan bikerê? Bawerîya ma de no çin o. Tu heqê înan çin o bawerîya ma perçe bikerê.”