Sîdra Mamo

 

ŞEHBA - Derheqê hedefgirewtişê tutan ê hetê dewlate tirke ra, tutê ke netîceyê topvaranê dewleta tirke de Til Rifatî de birîndar bî wina vatî: " Ma wazena cuyêka bi huzûre û dûrê topanê dewleta tirke de bicîwîyî."

 

No demêkê yo dewleta tirke ya îşxalkere bi tanq û topanê xo hêrişê mintiqaya Vakur û Rojhelatê Sûrîye kena. Bi xususî dewanê Kantonê Şehba û qezaya Şêrewayî ya Efrînî topvaran kena. Bi nê hêrişan dewleta tirke hedefgirewtişê sivîlan xo rê kerda rojeve. 27ê Temmuze de dewleta tirke bi topan bajarokê Til Rifatî hedef girewtebî, netîce de 6 kesî birîndar bîbî. Mîyanê înan de di tutî zî birîndar bî. Êdî tutî, cinî, kal, pîr û pêro sivîlî binê hedefê dewleta tirke de yê. Derheqê babete de tutê Efrînî yê ke netîceyê topvaranê dewleta tirke de birîndar bîyê ajansê ma rê qisey kerdî.

 

'Ma xeylêk tersayî, ma nêeşkayî xo bipawê’

 

Kewser Mistefa ke 17 serrî ya û Efrîn ra ya, nika Til Rifatî de koçber a derheqê serebûtê topvaranî de wina vat: "Demo ke ma Efrîn ra koçber bî û heta nika rojane ma rastê hêrişan yenê. Seba tîya îmkanî tay ê, min û waya xo ma waşt ke şêrê karê mîyanê erdan. Seba ke ma bi dayîk û pîyê xo dir bibê hetkar. La demo ke ma serê karê xo de bî, dewleta tirke top eşt mîyanê erdî, dedtpêk de derûdorê ma kewtî. Dima ra zî top gêna ma ro û ma nêeşkayî xo bipawê. Ez û 5 embazê xo ma  birîndar bî, birîna embazanê mi xeylêk giran bî, seba nê derbazê Helebî kerdî. Ez xeylêk tersaya. Mi nêzanayîne senî xo û waya xo bipawî. Ez milê xo ra birîndar bîya, di birînî bedenê mi de virazyayî. La nika tay rewşa mi baş a.”

 

Kewser Mistefa tewr peyîn waştişê xo wina ard ziwan: “Ez wazena ke hêrişê serê sivîlan de bêrê vindarnayîş û êdî ma bieşkê cuyêka bi hizûr bicîwîyê. Seba ke ma û keyeyê xo cuyêka weş yewbînan dir derbaz bikerê.”

 

'Ez wazena cuyêka bi hizûre dûrê topanê dewleta tirke de bi aştî biciwîyî'

 

Sewsen Mistefa ke 14 serrî ya û nika Til Rifatî de ciwîyena, hîsê xo yê demê topvaranî de ard ziwan: "Ez bi waya xo dir derbazê mîyanê karî bîyîne. Seba ke ez bieşkî keyeyê xo dir bibî hetkar. La dewleta tirke reyna tîya zî ma kerdî hedefê xo. Ez xeylêk tersaya, ez waya xo û pîyê xo gêraya la mi înan nêdî. Waya mi wedarnabî nêweşxane seba ke aye birîndar bî. Dima ra mi zî berdî nêweşxane, seba ke parçeyê topvaranî kewtibi linga mi. Doktorî mi ra vat, ma nika nêeşkenê parçe vejê. Dimayê hewteyêkê do bi emelîyat lingê mi ra vejê. Mi tutîya xo mîyanê şerî de derbaz kerd. Ez wazena cuyêka bi hizûre biciwîyî. Dûrê dewleta tirke û topê înan yê serê herra ma.”