Sema Çaglak

 

ŞIRNEX - Cinîyê Şirnexijî reaksîyon vera birnayîşê daran mojnayî û dîyar kerdî ke bi birnayîşê daran wazenê mintiqa bêmerdim verdê û xozaya mintiqa  talan bikerê û vatî: “Na herre û milkê ma yo ke wazenê ma ra bigîrê la ma do vera nê vinderê û xozaya xo bipawê.”

 

Koyê Cûdî û Gabarî û mintiqaya Bestayî yê Şirnexî di serrî yo talankerdişê xozaye est o. Bi taybetî zî dewanê Keniyamîr, Birateto, Birapeşo, Deyndarok, Cinîwer, Belûzer, Rîsor, Serêrû, Tîkera, Qûrteka Pêşya, Girêdayincê, Şerevan, Xirtkbestê û Navyanî yê mintiqaya Bestayî de bêmabên darî yenê birnayîş. Goreyê raporê ke Baroyê Şirnexî amade kerdo, 7 mengan de se ra 8 wareyê daristanî ameyî talankerdiş û çinkerdiş. Sewbîna mîyanê roje de zî bi seyan kamyonê ke darî ameyê barkerdiş derbazê teberê bajarî yenê kerdiş.

 

Reaksîyon û nêrazîbîyayîşê hemverê talankerdişê xoza û birnayîşê daran her ke şino zêde beno û seba ke vernîya nê qirkerdişî bêro girewtiş, Şirnex de tewir bi tewir çalakî û bername yenê organîzekerdiş. Cinîyê ke reaksîyon vera birnayîşê daran dayî, dîyar kerdî ke do heta peynî xoza bipawê.

 

'Darê seserreyî ameyî birnayîş’

 

Helîm Gîlçe, destpêkê qiseykerdişê xo de birnayîşê  daran şermezar kerd û wina vat: “Bi birnayîşê daran wazenê ma xoza û welatê ma ra bivisnê. Amancê înan bêverdayîşê mintiqa yo. Nê darê ke yenê birnayîş, seserre ra zêdeyêr ê û yê dewa Remo yê. Darê Cudî qedênayî û nika zî dore ameya Besta û Gebarî. Nê darî ke se serre yê, pey kamyonan de yenê barkerdiş, zerrîya ma dejnenê. Wa destê xo xoza û daranê ma ra biancê.”

 

‘Tu bajarêkê de qirkerdişêk wina çin o’

 

Helîme, vat serê xoza de hêrişêk taybet est o û vat: “Çi kare înan koyanê ma û darîstananê ma de est o. Ê dizd û gonîwer ê. Wa bêrê temaşe bikerê çi bi welatê ma kerd ê. Tu bajarêkê de qirkerdişêko wina çin o. Koyanê ma bêdar verdayî û seba xo rotî. Ma bi nê qehîrîyenê.”

 

‘Ma hemverê qirkerdişî de bêveng nêmanenê' 

 

Kumru Uner zî vat mintiqa de talankerdişê xoza est o û vat: “Her darêke seba ma mîrasêkê xoza ya. Her darike de gonîya şehîdanê ma est a. Nika zî destê qorîcîyan de nê yenê çinkerdiş. La ma hemverê nê qirkerdişî bêveng nêmanenê. Ê çi bikerê zî ma dewaya şehîdanê xo ra anêgêrenê û fek herra xo ra vera nêdanê. Bi serran o daristananê koyanê ma veşnenê û nika zî darê ke mendê birnenê û roşenê. Wazenê herre û milkê ma, ma ra bigîrê. La ma do hemverê nê de vinderê û xozaya xo bipawê.”