WAN - Endamê Dayîkê Aştîye yê Wanî reaksîyon vera polîtîkayê şerî yê bi destê AKP û PDKyî dewam kenê, dayî û dîyar kerdî ke ganî seba aştîye pêvînayîşê bi Rayberê PKKyî Abdullah Ocalanî dir bêrê kerdiş. Sewbîna veng dayî ke hemverê şerî pîya bibê qalxanê ganeyî û seba aştîye têkoşîn bikerê.

 

Hêrişê bi polîtîkayê şerî yê AKP-PDKyî mintiqa de yenê kerdiş, Vakur û Rojhelatê Sûrîye û Mintiqaya Federal a Kurdistanî zî dewam kenê. Çarçewaya hêrişan de wareyê cuye hedef yenê girewtiş û nimûneyê nê zî Mintiqaya Federal a Kurdistanî de ame ciwîyayîş. Dewa Perexî ya qezaya Zaxoyî ya Duhokî de wareyêkê seyrangehî de hêriş ame kerdiş û yew ci ra pitik bi 9 welatijî ameyî qetilkerdiş û 20 kesî zî zêdeyêr birîndar bî. Reaksîyonê hemverê hêrişan dewam kenê. Endamê Dayîkê Aştîye yê Wanî zî na babete de reaksîyonê xo ardî ziwan.

 

Ma bibê yew

 

Dayîka Aştîye Zarîfe Bor dîyar kerd ke ganî aştîye bi ca bêro û wina vat: “Wa êdî kes nêmiro. Ne gerîlayî, ne leşkerî û ne zî polîsî. Ez venga heme dayîkan kena; bêrê ma bibê yew û nê şerî vindarinê.”

 

‘Çîyê ke Barzanî keno şerm o, lêşinî yo’

 

Zarîfe wina dewam kerd: “PDK bi AKPyî dir hemkarî keno û kurdan qetil keno. Çîyo ke Barzanî keno şerm o, lêşinî yo. Wexto ke DAIŞî hêrişê Iraqî kerd, eke yewîya kurdan çinbîne do DAIŞî vînî nêkerdêne. Bi xêrê yewîye felaketê pîlî ameyî astengkerdiş. Barzanî serê kurdan de top û bombayan varneno. Çekanê kîmyayî xebitnenê. Barzanî temsîlkarîyê Kurdî heq nêkeno. Werrekna Kurd nêbîne. Seba pereyan xîyanet kurdan rê keno.”

 

‘Barzanî xîyanet şarê xo rê kerd’

 

Saadest Oklu zî bi şermezarkerdişî dest bi qiseykerdişê xo kerd û vat: “Ez Dayîka Aştîye ya. Ez dayîkêke kurd a. Ez Barzanî şermezar kena. Lanet kena. Ez nêwazena nameyê Barzanî bîyarî serê ziwanê xo. Seba ke xîyanet şarê xo rê keno. Zaxo bombavaran kerdî, 9 kesî qetil kerdî. La Barzanî nêvejîya reaksîyon nêmojna ra. Nêvat çira şima şarê mi qetil kenê. Ê qirkerdişî de zî bi tabutê tutan poz dayî. No şerm o. No nêeşkeno bêro qebûlkerdiş. Ez sey dayîkêke na rewşe ra şerm kena.”

 

‘Ma şer vindarinê’

 

Saadete tewr peyîn wina vat: “Seba aştî bi ca bêro ganî bi Birêz Ocalanî dir pêvînayîş dest pêbikerê. Seba ke caardişê aştîye destê Birêz Ocalanî de yo. Kilîtê aştîye destê eyî de yo. Wa kes nêmiro. Wa ganê kesî nêveşo. Wa dayîkî hêsiran nêvarnê. Mi pêrodayîşan de lajê xo vînî kerd. Ganê mi veşa, wa ê dayîkanê bînan nêveşo. Ez venga pêro dayîkan kena, bêrê ma pîya bibê qalxanê ganeyî û seba aştîye têkoşîn bikerê.”