Sema Çaglak

 

ŞIRNEX - Cinîyê Dewa Setkarî yê qezaya Elkî ya Şirnexî, bi fêkî û zebzeyê k wuşk kenê amadekarîyê xo yê zimistanî kenê.

 

Amedekarîyê zimistanî ke her serre sey adetêkê mintiqa de yenê kerdiş, dewa Setkarî ya girêdayê qezaya Elkî ya Şirnexî de zî bi kede û destê cinîyan dewam keno. Mewsimê hamnanî de fêkî û zebzeyê ke bi kedêka pîle yenê resnayîş, ver bi peynîbîyayîşê mewsimî dir seba zimistanî yenê amadekerdiş. Dewa Setkarî ke bi berzbîyayîşê koyanê xo û bi weşikbîyayîşê xozaya xo merdimî mest kena hetê ramitişî ra zî wayîrê herrêka bi bereket a. Dewe de tewr zêde darê fêkî est ê û welatijê dewe her tewirê fêkî ke arêdanê, seba zimistanî zî feyde bigîrê wuşk kenê.

 

Halîme Temel (67) ke seba zimistanî sayan wuşk kena, hem seba keyeyê aye feyde bigîro amade kena û seba debare zî roşena. Halîme, wina qal kerd: “Ma mewsîmê hamnanî de sayan daran ra arêdanê. Arêdayîşê daran xeylêk zehmet o. Ma seba ke şêrê mîyanê baxçeyê xo xeylêk rayîr ra şinê. Dimayê ke ma sayanê xo arêdanê û benê keye, ma bi saetan înan werdê kenê. Gama ke ma sayan werdê kenê, destanê ma de xeylêk birînî virazênê û peretênê. Ma peynî de sî ê sayan serê banî de danê ro û pabeyê wuşkbîyayîşê înan vindenê.”

 

Halîme, dîyar kerd ke ê tena sayan wuşk nêkenê û vat: “Ma eynî wextî miroyan û şiqoqan zî û xeylêk fêkî, zebze wuşk kenê. Sewbîna wextê gozan de zî mq gozan amade kenê. Zehmetîyê ci xeylêk zêde yê. Seba arêdayîş û ziwakerdişê gozan kedêka pîl lazim a. Labelê ma înan ra feyde zî nêgînê. Hem seba werdê xo yê zimistanî wedarnenê, dîyarîyê merdimanê xo kenê û yê ke zêde manenê zî ma roşenê û pê debara xo kenê.”

 

‘Ma nê kulturî pare kenê’

 

Soylemez Temel zî wina qalê prosesê amadekarî kerd: “Ma sayanê ke wuşk kenê xêrcê rotişî zî xeylêk tewir xida viraznenê. Bi xususî ma zimistanî înan ra xoşaf viraznenê. Ma do heta nêzdîbîyayîşê mewsîmê payîzî wina sayan arê bidê, tole bikerê û wuşk bikerê. No zimistanî de seba ma rehetîyêk o. Ma nê kulturî zî pare kenê. Dimayê ke pêro baxçeyê ma resayî, ma xêrcê wuşkerdişê sebze û fêkî ma rêçal zî viraznenê, salçe û xeylêk çîyê bînan zî viraznenê.”