Zuhal Atlan

 

MERKEZÊ XEBERAN - Çapemenîya îqtîdarî gama ke nusena yan zî temaşekerdoxan rê neql kena, bi xetêke wina barî kena ke wendekarî yan zî temaşekerdoxî cinîya ke ameya qetilkerdişî rê ney, vera serebûtî bi hêrs ê. Çapemenîye kiştoxan sey ‘sapik, psîkopat’ neql kena û esas de hewl dana ke na vaja na babetêka polîtîk nîya.

 

Hewteyê vîyarte de xeberêka cînayetêkê cinî ame weşanayîş. Cinîya bi nameyê Pinar Damare hetê keyeyî ra cigêrayîşê aye yeno kerdiş û derheqê ça de ya zanayîşê cayî gênê. Sey yeno vîrê şima di serrî verê Pinar Gultekîne zî vernîya ke cenazeya aye bêra vînayîş, xeberêke ameye weşanayîş û heta ke ame famkerdiş ke Pinare ameya qetilkerdiş. Eke cinîyêke vînî biba û nêro vînayîş, xeberêka qetilkerdişî vejêna werte. Cenazeya Pinar Damare zî sey Pinar Gultekîne wareyê daristanî de ameye vînayîş û kiştox reyna camêrdo nêzdîyê aye yo. Gelo ma şaş mendî. Ney!

 

Gelo tesaduf o?

 

Dimayê cînayetê Pinar Damare vejîya werte,  Daniştayî derheqê dewaya betalkerdişê feshkerdişê Peymana Stenbolî de zî qerarê redî da. La balkêş o, wexto Pinar Gultekîne ameye qetilkerdiş, demêko ke Peymana Stenbolî hedef amebî girewtiş bî. Her di Pinarî zî menga Temmuze de ameyî qetilkerdiş. Yewe 2020ine de a bîne zî 2022ine de. Cinîyê ke her deqe bi endîşeyê hetê camêrdêkê ra bêrê qetilkerdiş ciwîyenê...

 

Qetilkerdişê Pinar Damar

 

La cînayetê Pinar Damare hetê rêxistinê cinîyan ra, partîyê sîyasî, rêxistinê heqê merdiman ra zêde nêameye rojeve. Tena  çend mesajê hêrs û tweetî. Sebebê nê çî yo, gelo tevgerê cinîyan êdî baş cigêrayîş nêkenê yan zî bi rastî rojevêke xeylêk pirr de yê û demê înan çin o? Goreyê mi ê ewilî yo. Hemverê qerarê Daniştayî yê seba Peymana Stenbolî veng nêame vetiş, do seba cînayetê Pinar Damare vejê... Bêguman welat de roje 5 cinî yenê qetilkerdiş, serewedaritiş û têkoşîn bîyo rêze. La goreyê mi bêvengî yena manaya ke vernîya polîtîkayê meşrûkerdişî yê îqtîdarî akena.

 

Têkilîya aye ya bi gumanbarî dir bî rojeve

 

Babetêka bîn zî cînayetê Pinar Damare de zî sey ya Pinar Gultekîne, vera ke serê kiştişî de vinderê, serê polîtîkayan de vinderê û helwestî rexne bikerê, têkilîyê Pinar Damare ya bi Metîn aydinî dir ame dest girewtiş. Gelo no xerîb o? Sey ya Pinar Gultekîne tîya de zî  têkilîyê aye ame destgirewtiş.

 

Ma prosesê Pinar Gultekîne ra zanê

 

Pawitişê kiştoxê Pinar Damare şibyeno kiştoxê Pinar Gultekîne. Çapemenîya terefdare her roje fotografê Pinare weşanayî û vatî bi kîtoxî dir têkilîyê aye estbi û sey sucdar ramojna. Ma qetilkerdişê Pinar Gultekîne de zî şahidîyê nê kerd.

 

Çapemenîya îqtîdarî gama ke nusena yan zî temaşekerdoxan rê neql kena, bi xetêke wina barî kena ke wendekarî yan zî temaşekerdoxî cinîya ke ameya qetilkerdişî rê ney, vera serebûtî bi hêrs ê. Çapemenîye kiştoxan sey ‘sapik, psîkopat’ neql kena û esas de hewl dana ke na vaja na babetêka polîtîk nîya. Kiştoxan sey psîkopatêk ke ganî bêrê dermankerdiş mojnena. Bi nê sifatan zî xelatêke bîn zî hukmî ra gênê: Tahrîkê bêheq! Sey yê Cemal Metîn Avci.

 

Yan şima do bivuryê yan şima do bivuryê!

 

Pêwa ke ma bi desin rey nusenê û vanê, rastîyêke çapemenîye ya ke şaşîyanê xo de israr kena est a. Ganî no zî bêro vatiş ke neqlkerdişê cînayetê cinîyan, rîpelê hîrên de bêrê dayîş, her çiqasa sey babetêka polîtîk nêro vînayîş zî bi kilmî; goreyê verê tay bo zî averşîyayîşêkê est o û no zî xêrê tevgerê cinîyan o. Ma do bi israr binusê ke cînayetê cinîyan polîtîk o. Yan şima do bivuryê yan şima do bivuryê...