KOCAELÎ - Emîne Îpek ke 30 serrî yo zîndan de tepişte bî, dimayê ke înfazê aye qedîya tahlîye bî. Emîne, verê Zîndanê Gebzeyî yê Cinîyan de bi çepikan, tilîlîyan û vilan ameye pêşwazîkerdiş.

 

Emîne Îpek ke Zîndanê Girewte yê Cinîyan ê Gebzeyî de tepişte bî, dimayê 30 serrî cezaya aye peynî bî, ameye veradayîş. Emîne serra 1992ine de wexto ke hema 18 serrî bî, Dadgeha Asayîşî ya Dewlete (DGM) ameye muhakemekerdiş û bi îdiayê "endamîya rêxistina terorî" 30 serrî cezaya zîndanî ameye birnayîş.

 

Dimayê 30 serrî reya ewil cinîyêke ameye veradayîş

 

Emîne ewil surgunê Zîndanê Xerpêtî û dima ra surgûnê zîndanê Riha, Sêwas, Êlih û Çewlikî kerdî. Tewr peyîn zî Emîneya ke surgûnê Zîndanê Girewte yê Cinîyan ê Gebzeyî ameye kerdiş, 30 serrî yo zîndan de tewrê xeylêk grevê vêşanîye bî. Emîne yew a cinîyan ra ya ke 30 serrî yo bêmabên zîndan de mende û ameya tahlîyekerdiş a.

 

Bi çepik, tilîlîyan û vilan pêşwazî kerdî

 

Verê zîndanî de keyeyê Emîne, aktîvîstê Tevgerê Cinîyan ê Azadan (TJA), Kongreya Demokratîke ya Şaran (HDK), endamê Komeleya Cinîyan ê Demî, Komeleya Paştdayîşî bi Keyeyê Tepişte û Hukûmwerdoxan dir (MATUHAY-DER) yê Marmarayî û endamê Înîsiyatîfê Dayîkê Aştîye aye bi coşêkê pîl û bi vilan pêşwazî kerdî.

 

Ame dîyarkerdiş ke Emîne bi çepik û tilîlîyan ameye pêşwazîkerdiş, dimayê demêkê bi keyeyê xo dir Stenbol de bimano û dima ra zî do şêro qezaya Pasûrî ya Amedî.