Sema Çaglak

 

ŞIRNEX – Avûkate Gulnur Yilmaz, dîyar kerd ke Şirnex de hemverê xoza de qirkerdişê sîstematik est o  û vat, ganî birnayîşê daranê Şirnexî  bikewo temamê rojeve dinya.

 

Koyê Cûdî û Gabar û Mintiqaya Bestayî yê Şirnexî de di serrî yo bi destê qorîcîyan binê muşahedeyê leşkeran de darî yenê birnayîş. Besta de bi des hezaran darî hetê qorîcîyan ra ameyî birnayîş û talankerdiş. Her roje mabêne 20-25 kamyon û TIRî ke daran bar kenê, şinê teberê bajarî. Goreyê raporê Baroyê Şirnexî de mîyanê 7 mengan de %7 wareyê darîstanan ameyê çinkerdiş.

 

Reaksîyon û nêrazîbîyayîşê hemverê qirkerdişê xozaya Şirnexî her ke şino tewr zêde beno. Avûkate Gulnur Yilmaz derheqê babete de qisey kerd. Gulnure, dîyar kerd ke Tirkîya bi nê qirkerdişî dir eşkera sûc kena û wina vat: "Şirnex de seba bidestkerdişê rant û darê erjanî, daristanî yenê çinkerdiş. Qorîcîyan ra bigîre, heta leşker û heme selahîyetdarê dewlete şirikîyê nê qirkerdişî kenê. Qirkerdişo ke Tirkîya bi birnayîşê daran kena, hem hetê huqûqê mîyanî hem zî hetê huqûqê mîyanneteweyî suc o. Bi serran o Şirnex binê nameyê mintiqaya asayîşî de xozaya ci yena çinkerdiş û hemverê nê de her kes bêveng o. Qirkerdişê xoza nîno qebulkerdiş û ganî selahîyetdarî hesabê nê qirkerdişî bidê."

 

‘Bêvengî do qirkerdiş tewr pîl bikero'

 

Gulnure, da zanayîş ke wina cuya şarê mintiqa zî kenê tehluke û vat: "Dewamê  hesabê bidestkerdişê rantî de cuya şarê mintiqa zî kenê tehluke. Hemverê nê welatî de hêzêk yewperestî yê hegemonîk est o. Verê mintiqa de bi serebûtê kerdoxê nêdîyar de waştî ke cuye çin bikerê. Nika zî bi qirkerdişê xoza hem bi demografyayê mintiqa de yeno kaykerdiş, hem zî wareyê ganeyan yeno çinkerdiş. Pêwa nînan serebûtê qirkerdişî ser o welat de bêvengîyêke pîl est o. Na bêvengîye rayîr dana ke hemverê xozaya mintiqaya de hêriş û qirkerdişê pîlî û xidar bêrê kerdiş."

 

 ‘Helwestê Greenpeace ganî bêro şermezarkerdiş'

 

Gulnure, bale ant eşkerayîya  Greenpeace ke seba gerrekerdişê baroyê Şirnexî ser o û vat: "Bêguman hemverê nê qirkerdişî tevgerê huqûqî est ê. Eke babete Bahra Spî nêbo, cografyaya Kurdîstanî bo sazgehêkê sey Greenpeace zî dîrîyê xo mojneno. Seranserê dinya de krîzê îklîmî her ke şino tewr giran beno. Hemverê nê qirkerdişê daranê Şirnexî de zî helwestê Greenpeace ganî bêro şermezarkerdiş. Têkoşînê seba ekolojî ganî seba mintiqayêkê nêbo. Temamê dinya de seba ekolojî têkoşînêk yeno dayîş û heme girêdayê yewbînan ê."

 

‘Qirkerdişê daran ganî rojeve ra nêvejîyo'

 

Gulnure, tewr peyîn wina qedêna: "Baroyê Şirnexî derheqê qirkerdişî de xeylêk raporî amade kerdî. La heme muracat û gerreyê înan bêcewab mendî. Ma zanê ke hemverê helwestê huqûqî polîtîkayêkê bê netîce verdayî kerdê dewre. Pêwa nînan xeylêk hewildayîşê huqûqî est ê û do tewr zêde bibê. Şirnex de hemverê xoza de qirkerdişêkê sîstematik est o û ganî bêro vindarnayîş. Sewbîna yê ke nê qirkerdişî kenê, ganî hem hetê huqûqî mîyanî û hem zî hetê mîyanneteweyî de bêrê cezakerdiş."