WAN - Merdima tepişyeyê nêweşî Aslihan Tîmur ke Nobeta Edeletî ya Wanî de ya, hemverê rewşa tepişteyê nêweşî yê Zîndanê Tîpê Fyê Wanî bi Kovîd 19 kewtê venga selahîyetdaran kerd û vat: “Ma nê qebûl nêkenê. Êdî bes o. Gelo tutê ma çira nênê dermankerdiş? Çira şima nêbenê nêweşxaneyan? Ez bêra tepiştiş zî bêra qetilkerdiş zî ez o çalakîya xo dewam bikerî.”

 

Binpaykerdişê heqan ê zîndanan her ke şinê zêde benê û rewşa tepişteyê nêweşan her ke şina giran bena. Bi xususî zîndanê mintiqa de zî binpaykerdişî her ke şinê giran benê. Zîndanê ke tepişteyî nêeşkenê xo biresnê tu lazimîyê xo yê cuye, demo peyîn de bi zêdebîyayîşê Kovîd 19î dir rewşe her ke şî tewr giran bî.

 

Dejvindarneye danê tepişteyan

 

Goreyê îdiayê ke Zîndanê Tîpê Fyê Wanî de zîndano akerde yê kampusê zîndanî yo, hûmara kesê ke bi kovîd kewtê zêde bîya û werdê ke yenê werdiş zî hetê xebatkaran ra tepişteyê Tîpa Fyî, Asayîşê Berzî û Tîpa Tyî rê zî ameyê vilakerdiş û seba nê zî serebûtê kovîdî zêde bîyê. Ame dîyarkerdiş ke zîndanê Tîpê Fyî tewr peyîn 5 tepişteyî bi vîrus kewtê, la pêwa nê îdareyê zîndanî dejvindarneye û antîbiyotîk dayê tepişteyan.

 

Sewqê nêweşxaneyî nêkenê

 

Cinîya bi nameyê Aslihan Tîmur Wan de seba tepişteyan Nobeta Edeletî de ya û dîyar kerd ke lajê aye Botan Tîmur 7 serrî yo tepişte yo û pêvînayîşê telefonî yê hewteyî de dîyar kerdo ke bi kovîd kewto. Aslihane da zanayîş ke nîşaneyê lajê aye; adirê bedenî, virtiş, bêhalî yo û dimayê nê sewqê nêweşxane ameyo kerdiş.

 

‘Nêverdenê ez lajê xo bivînî’

 

Aslihane dîyar kerd ke lajê aye 7 serrî yo tepişte yo,  bi bahaneyê cezaya dîsîplînî bi 6 mengî yo lajê xo nêdîya û wina vat: “Nêverdenê ke ez lajê xo bivînî. Ez tena telefon de 10 deqeyan qisey kena. Lajê mi binê şertê tecrîdê giranî de têkoşînê cuye dano. Seba nê  binpaykerdişan bi 9 mengî yo ma Nobeta Edeletî de yê. Çalakîya ma demêkê derg a Baroyê Wanî de dewam kerd na rey verê Kampusê Zîndanê Wanî, ATK û Edlîye de dewam kena.”

 

‘Tepişteyan ganî vera bidê’

 

Aslihane dewam de wina vat: “Ma seba cenazeyî zîndanan ra nêvejîyê têkoşîn kenê. Pêro vengdayîşê ma bêcewab yenê verdayîş. Wezîrê Dade, serekkomar û îqtîdar polîtîkayê şerî dewam keno û bi nê polîtîkayan cewab dano ma. Vanê ke tutanê şima întîxar kerdê la ma zanê ke tepişteyî peynîya cuya xo nêanê. Tutê ma yenê kiştiş. Merdişê înan bi guman o. Berpirsê înan est o. Ma nê qebûl nêkenê. Êdî bes o. Wa ganî tepişteyê nêweşan vera bidê.”

 

‘Heta aştî bi ca nêro ma do çalakî dewam bikerê’

 

Aslihane tewr peyîn zî wina vat: “Ez bêrî tepiştiş zî  bêrî qetikerdiş zî ez o çalakîya xo dewam bikerî. Ma verê zîndanî, verê nêweşxane û verê edlîye de çalakîya xo dewam kenê. Ez tena bimana zî ez o çalakîya xo dewam bikerî. Amancê mi aştîye yo. Wa pêrodayîşî peynî bibê. Wa tepişteyê sîyasî bêrê veradayîş. Heta edalet bi ca nêro ez o çalakîya xo dewam bikerî.”