Sema Çaglak

 

ŞIRNEX - Helîme Yaman ke qezaya Qilebanî de bi karê ramitişî dir debara xo kena, dîyar kerd ke ê feyde berardişê xoza ra gênê.

 

Ramitiş parçeyêkê cuya kollektîfî yo. Mintiqa de xususî cinî bi karê ramitişî dir eleqedar benê û xeylêk cinî bi ramitiş debara xo kenê. Mintiqaya Botanî ke wayîrê wareyêkê dewlemend û herrêka bi bereket a, çimeyê ci yê debare zî ramitiş o. Halîme Yaman (39) ke qezaya Qilebanî de ya, bi karê rez û baxçeyî dir eleqedar a û dîyar kena ke merdim gama ke biwazo eşkeno feyde berardişê xoza ra bigîrê.

 

Halîme, dîyar kerd ke aye tutîya xo de her tim bi karê rez, baxçe, pesdewarî û karê zozonan dir eleqedar bîya. Halîme, wina vat: “Ma debara xo bi pesdewarî, berardişê ramitişê xozayî bi dest kenê, kenê. Destpêkê wisarî dir ma dest bi ramitişî kenê û her tewir sebze û fêkî ramenê. Bi mengan seba ke baş biresê ma şuxulênê û dimayê ke resayî ma hem seba werdê xo wedarnenê û hem zî yê ke mendê roşenê û pê debara xo kenê. La seba ke ma înan biresnê zî ma kedêke pîl danê. La seba ke ma înan ra feyde gênê keda ke danê kêfweş ê.”

 

‘Ma pêro berardişan ra feyde gênê’

 

Halîme, dîyar kerd ke her çiqas zehmetîyê karê înan bibo zî karê xo ra kêfweş ê û wina vat: “Ma bi berardişanê xo amadekarîyê zimistanî zî kenê. Ma  fêkî û zebzeyê mende wişk kenê û înan kenê rêçal û marmelat. Saetê sere siba ra heta şan de ma rez û baxçeyê xo de yê û kede danê. Karê ma zahmet o. Ma erd kolenê, aşêfe kenê û awe danê. Ma xeylêk benê rincan la no rincanbîyayîş merdimî bêzar nêkeno. Gama ke merdim karêkê ra hes bikero, rincanî zî xem nêkeno.”

 

‘Mîyanê xoza de xo vînena’

 

Halîme, tewr peyîn dîyar kerd ke cinî û xoza her tim xurt bîyê û wina vat: “Ez mîyanê xoza de xo vînena. Girêdayîşê cinî bi herre dir xeylêk xurt o. Cuya dewe xeylêk weş a. La ganî seba cuya dewe, tewr zêde alternatif û averşîyayîş bibê. Êdî xeylêk kesî agêrayî dewa co û ramitişê xoza kenê. Ez bi nê bawer a ke demê bêrê de do hûmara nê kesan tewr zêde biba.”