Hêlîn Asmîn

 

QAMIŞLO - Endama Dîplomasî yê Kongreya Starî Rûken Ehmed serê netîceyê Forûmê Cinîyan ê  Rojhelatê Mîyanên ê bi munasebetê 10ine serrgêra Şorişê 19ê Temmuze ame kerdiş, qisey kerd. Rûkene bale ant serê amancê forûmî ke ame kerdiş û vat: "Yew amancê Forûmê Cinîyan ê Rojhelatê Mîyanên, têkoşînê cinîyan ê hempar o."

 

Kongreya Starî bi munasebetê 10 serrîya Şorişê Rojawanê Kurdistanî, şorişê cinîyan û bi amancê dayîşşinasnayîşê cinîyan ê wareyê şorişî de bi sloganê, "Bi Hemgirewtişê cinîyan ma do destkewtişê şorişî bipawê û geş bikerê." Forûmê Cinîyan ê Rojhelatê Mîyanên organîze kerd. Forûmê Cinîyan ê Rojhelatê Mîyanên, Unîversîteya Rojawanî bi beşdarîyê 7 rêxistinê cinîyan ê Komîteyê Zenûbiya, Meclîsê Cinîyan ê Suryanî, Meclîsê Cinîyan ê Vakur û Rojhelatê Sûrîye, Meclîsê Cinîyan ê Sûrîye, Jineolojî, Kongreya Starî, Yewîneyê Pawitişê Cinîyan (YPJ) ame kerdiş. Endama Dîplomasîyê Kongreya Starî Rûken Ehmed serê netîceyê Forûmê Cinîyan ê Rojhelatê Mîyanên ê bi munasebetê 10ine serrgêra Şorişê 19ê Temmuze ame kerdiş, qisey kerd.

 

'Şorişê Rojawanî şorişê heme cinîyan o'

 

Rûken Ehmedî derheqê Forûmê Cinîyan ê Rojhelatê Mîyanên ê  bi munasebetê 10ine serrgêra Şorişê 19ê Temmuze ame kerdiş, qisey kerd û nê çî vat: "Amancê  ma yê seba nê forûmî yew zî o bi ke ma bieşkê imtihanê ma, şorişê xo ra girewto, bi cinîyê Rojhelatê Mîyanên dir pare bikerê. Forûmê ma bi beşdarbîyayîşê 1000 delegeyan û 7 rêxistinê cinîyan ame kerdiş. Eynî wextî de cinîyê ke waştêne bêrê la nêeşkayî bêrê, bi rayîrê onlîne tewrê Forûmî bî. Hetê her cayê dinya de Forûmê ma de amade bî. Seba amancê ma yê sereyîn o bi ke ma  bieşkê imtihanê şorişê ke bi 10 serrî yo Rojawan de bi ca ameyo, bi temamê cinîyan dir pare bikerê. Eynî wextî de ma serê babete de mîyanê nê 10 serran de milê ke ma kêm mendo çî yo, safîkerdişê nê çî yo û ma do temamê cinîyan dir senîn bibê cewab, vindertî. Şorişê ma hema dewam de yo û xeylêk tehluke ser de est o. Bebetê sey ma do şorişê xo senî bipawê, heta nika destkewtişê bîyaye senîn xurt bikero û do senî tewr zêde aver şêrê, xeylêk muhîm o. Derheqê na rewşa cinîyan ke mintiqayanê hetê dewleta tirke ra ameyê îşxalkerdişî yê sey; Efrîn, Girê Spî, Serêkanîye û cinîyê Afganîstanî ameyî munaqeşkerdiş. Serê nê esasî de hemverê heme hêrişê îşxalkerdişî de ma do têkoşînê xo dewam bikerê. Şorişê Rojawanî şorişê heme cinîyan o."

 

'Yew amancê Forûmê Cinîyan ê Rojhelatê Mîyanên, têkoşînê cinîyan ê hempar o'

 

Rûken Ehmedî qiseykerdişê xo de bale ant serê xoverdayîşê cinîyan ê hempar û vat: "Rojhelatê Mîyanên de problemê cinîyan xeylê xo yew ê. Hişmendîyê camêrdan, îslamê sîyasî, netewperestî û cinsperestî hempar ê ke cinî hemverê têkoşînî bikerê. Projeyê ma seba heme cinîyan Rojhelatê Mîyanên derbaz beno. Eynî wextî de cinîyê dinya zî eşkenê mîyanê projeyê ma de ca bigîrê. Seba Sîstemê Neteweyî yê Demokratîke seba heme dinya yo. Rojhelatê Mîyanên de rêxistinê cinîyan kêmî yo. Xeylê sewîyeya şexsan de mendo. La bi 10 serrîya Şorişê Rojawanê Kurdistanî de, ma eşkenê vajê xeylêk gamê muhîm ê, ameyî eştiş. Hişmendîyê sîstemê bîyaye bi serran o ke şarê mintiqa yewbînan dûr fisto, serê cinîyan de zî tesîrêkê negatîf dayo awankerdiş. La bi şorişê ma dir, bi cinîyan dir pêyewgirewtişêk virazya. Do tesîrê xo serê komelî de zî bikero. Sey Tevgerê Cinîyan ê Kurdî ma tena seba Cinîyê Kurdî têkoşîn nêkenê. Ma seba temamê  cinîyan ê dinya têkoşîn kenê. Amanc têkoşînêkê hempar o. Xora yew amancê Forûmê Cinîyan Rojhelatê Mîyanên zî, têkoşînê cinîyan ê hempar o. Milê qanûnî de xeylêk destkewtişê ma estê. No qanûn seba heme cinîyê Sûrîye ciwîyenê derbaz benê. Sîstemê Rejîmê Sûrîye cinîyan de xeylêk yewbîyayîş dayo awankerdiş. Nê 10 serran ke derbaz bîyo de her çiqas teda û hêrişê zaf xidar ameyî kerdiş zî ma reyna rêxistina xo awan kerd û ma resayî xeylêk cinîyan."

 

'Şehadetê Jiyan, Roj û Barîne do ma rê bibo bingehê têkoşînî yo'

 

22yê Temmuze de Fermandara QSD û YPJyî Jiyan Tolhildan, Fermandar Roj Xabûr û endama YATyî Barîn Botan netîceyê hêrişê teyareyêkê bêmerdimî yê dewleta tirke de dinyaya xo bedelnaye û vat: ''Roja yewin ê Forûmî de fermandera YPJyî  Jiyan Tolhildan panelê rolê pawitiş û tehlukeyê estê ard ziwan. Xususî serê rolê YPJyî ke hemverê çeteyan xo ver da û seba heme cinîyanê dinya bî îlham û tehlukeyê heta nika serê şorişê ma est o kam ci sewîye de yo, lazim o ma  hemverê nînan de xo senî bipawê, vinderte. Pawitiş tena wezîfeyê YPJyî nîyo, wezîfeyê heme cinîyan o. Cinî seba azad biciwîyê lazim o, xo bipawo. Hedefgirewtişê Jiyan Tolhildan bêguman do seba ma bibo hêrsê têkoşînî. Seba ke no reya ewil nîyo ke rayberê şorişê ma hedef yenê girewtiş. Şehadetê nê embazan seba ma dejêkê pîl o labelê wa hêzê îqtîdarî zî bizanê ke ma do têkoşînê înan dewam bikerê. Hêzê îqtîdarî zanê ke çiqas cinî xo birêxistin bikerê do sîstem vînî bikero. Seba nê her tim cinîyan xo rê kenê hedef. Ma zî sey cinî vanê tu hêriş îrade û bawerîya ma nêşikinenê. Ma nê hêrişan şermezar kenê. Çi beno wa bibo ma têkoşînê xo dewam bikerê. Do Jîyane sey nameyê xo her tim cuya ma de bo. Şehadetê Jiyan, Roj û Barîne do ma rê bibo bingeyê têkoşînî."