WAN - Vervatoxa Meclîsê Cinîyan ê DBPyî Aynur Sarica derheqê wedaritişê destnêdayîşê parlamentere Salîha Aydenize de wina vat: "Ma hemverê nê qerarî kuçeyan de, heme wareyê cuye de nêrazîbîyayîşê xo ramojnê."

 

Komîsyonê Têkelî de 5 fezlekeyê cîya yê derheqê wedaritişê destnêdayîşî yê Hemsereka Pêroyî ya Partîya Mintiqaya Demokratîke (DBP) Salîha Aydenîz de dayî raydayîşî. HDP û CHPyî raya, ney xebitnayî. AKP, MHP û ÎYÎ Partî rayê, belê xebitnayî. Raporê Komîsyonê Têkelî yê şerhê ke do bêro dayîş, ci de ca bigîro do menga teşrîna verêne de Heyetê Pêroyî seba nê pêvînayîş do bêro kerdiş.

 

Cinîyan derheqê wedaritişê destnêdayîşê Salîha de çalakîyê cîyan kenê. Vervatoxa Meclîsê Cinîyan ê DBPyî Aynur Sarica derheqê babete de qisey kerd. 

 

'Bi wedaritişê destnêdayîşê têkoşînê cinîyan kenê hedef'

 

Aynure vat, desynêdayîşê darbeyêkê hemverê têkoşînê cinîyan o û wina vat: "Leyla Zana ra bigî heta Leyla Guven û tewr peyîn Salîha Aydeniz bi serran o hemverê cinîyan de tedayêkê est o. Labelê ê bi nê hêrişan, nêresayî amancê xo. Demo ke zîhnîyetê camêrdan nêeşko, cinîyan rê hêriş keno."

 

'Derheqê hêrişê serê parlamenteranê ma de tu karê qanûnî nêame kerdiş'

 

Aynure dewam de wina vat: "Rayîr ra şîyayîşê Gemlîkî de zî polîsan cinîyê parlamenterî kerdî hedef. Labelê derheqê hêrişê serê parlamenteranê ma de tu karê qanûnî nêame kerdiş. Labelê parlamenterê ma hemverê nê de reaksîyon ramojnayî, destnêdayîşê înan ame wedaritiş. Waştişê wedaritişê tecrîdê serê Birêz Abdullah Ocalanî de zî komisyon de sey delîlê sucî ame ramojnayîş. Tu cayê nê qanûn de çin o."

 

'Polîtîkayê tedayî yê hemverê Şarê Kurdî dewam kenê'

 

Aynure dîyar kerd ke 1994ine ra heta nika qiseykerdişê sîyasetmedaranê kurdî yê ke kuçe, meclîs de sey suc ameyê vînayîş û wina vat: "Vernîya kerdişê sîyasetî yê kurdan yeno birnayîş. No polîtîkayêkê dewamkerdişî yê înkar, îmha û tedayî yo. Xeylêk rey partîya ma qefilnayî. Bi des hezaran kurdan kerdî zîndan. Xeylêk ci ra ameyî qetilkerdiş. Labelê her şerd û mercî de têkoşînê Şarê Kurdî pîl bi û dewam kerd."

 

'Wareyan de cinîyan kerdî hedef'

 

Aynure vat her ware de cinî bî hedef û vat: "Bi desan aktivîstê TJAyî seba hemverê şîdetê cinî têkoşîn kerdê, nika zîndanan de yê. Vervatoxa TJAyî Ayşe Gokkan zîndan de ya. Bi tayînkerdişê qeyûman sîstemê hemserekîye bi hedef û hêrişê projeyê derheqê cinîyan de kerdî. Nê dewayan de bi desan hemserekê ma ameyî tepiştiş."

 

'Ma qerarê wedaritişê destnêdayîşî qebûl nêkenê'

 

Aynure tewr peyîn wina vat: "Seba waştişê, 'neteweyêkê demokratîke' cinî benê hedef. Ma cinî hemverê zîhnîyetê yewperest ê îqtîdarî de cuyêka têduşt, azade pawenê. Wedaritişê destnêdayîşê Salîha Aydenîze operasyonêkê hemverê destkewtişê cinîyan o. Ma nê şermezar kenê û qebûl nêkenê. Ma do her ware de xo tewr zêde bi rêxistin bikerê û bi rayîrê demokratîk cewab bidê."