WAN - Tuto 12 serre H.E. yo ke wexto ke mişênanê xo çernayîne, netîceyê cismêkê leşkerî ke teqîya de birîndar bi, tehlukeyê ey yê cuye dewam keno. Dedê H.E.yî Sefer Eryilmaz ke derheqê rewşa ey de agahî da, dîyar kerd, pêwa ke agahî dayê leşkerî zî tu mudaxele nêameyo kerdiş û H.E. yo birîndar hetê tutan ra ameyo wedaritiş.

 

Qezaya Elbakî ya Wanî de dewa Kiratî de netîceyê cismêkê ke teqîya de tuto 12 serre bi nameyê H.E. giran birîndar bi. H.E.demo ke mişênanê xo çêrnayîne, nêzdîyê sînorê Îranî de netîceyê cismê leşkerî ke teqîya de giran birîndar bi. H.E. hetê di tutê ke emrê ey de bî, ame wedaritiş. Derheqê babete de dedê H.E. Sefer Eryilmaz ajansê ma rê qisey kerd.

 

Tutan ey wedarna û ard

 

Seferî dîyar kerd ke teqînayîşî dir tutan agahî dayo leşkerî la tu kes eleqedar nêbîyo û seba nê tutan H.E. heta dewe wedarnayê. Seferî ard ziwan, dimayê ke înan serebûtî eşnawitê, şîyê cayê serebûtî û wina dewam kerd: "Mazotê wesayîtê ma çinbi. Sena ke venga helîkopterî bikerê, ma agahî da leşkerî. La ma dir hetkar nêbî. Ma H.E. wedarna û bi wesayîtê keya ey berd dewe."

 

Tuto birîndar bi saetan ame vindarnayîş

 

Seferî dîyar kerd ke înan dimayê H.E. seba wesayîtî berdê verê berê  keya û dima ra bi ambulans berdê nêweşxaneyê Elbakî yê Wanî û uca ra zî berdê Nêweşxaneyê Unîversîteya Yuzuncuyiîl yê  Wanî. Seferî dîyar kerd ke H.E. 7 setane amelîyat de mend û goreyê agahîya ke doktoran ra girewtê, tehlukeyê ey yê cuye dewam keno.

 

'Qeza nîyo'

 

Seferî tewr peyîn wina qal kerd: "Leşkerî nêverdenê ma şêrê mêrg û çîmenanê xo û ma nêeşkenê vaşê xo biçînê. Heqaret ma rê kenê. H.E. seba rewşa ekonomîye şiwantî kerdêne. Leşkeran ma ra nêvat qedexe yo yan zî teqemenî uca de est o. Serebût qeza nîyo û bi zanebîyayîş ameyo kerdiş. Ma nêeşkenê keyeyê xo ra vejîyê û heywananê xo biçêrênê. Ma binê tedayê leşkerî de ciwîyenê. No serebûto ewil nîyo, verê zî gulevarnayîşê leşkeran ê kêfî ra welatîjêk seba guleyo ke gina lingê ey ro, astengdar mend."