ANQARA - Hemsereka Pêroyî ya KESKî Şukran Kaplan da zanayîş ke Tirkîya de OHAL bi hawayêke fîîlî dewam keno û bale ant serê Nobeta Edeletî û vat: “Demo bêro de ma do esasê têkoşînê huqûqî û demokrasî de têkoşînê di hetî ra bikerê."

 

Konfederasyona Sendîkayê Kedkaran ê Îstîmlakî (KESK) derheqê binpaykerdişê heqanê ke  bi OHALî dir dewam kenê û 20ê Temmuze de serra xo ya 6ine pirr kerd de bi sloganê, ‘OHAL dewam keno, bêhuqûqî pîl beno'  xeylêk bajaran de Nobeta Edaletî dayî destpêkerdiş. Dimayê nobeta 6 rojan dima, qeraro ke derheqê seba Peymana Stenbolî de ameyo dayîş, binpaykerdişê heqan, îxracan û xeylêk babetê bînî munaqeşe ame kerdiş.

 

Hemsereka Pêroyî ya KESKî Şukran Kaplan derheqê babete de ercnayîş kerd.

 

‘OHAL bi bedelê giran vejîya vernîya ma'

 

Şukrane dîyar kerd ke Tirkîya de demêkê derg o OHAL yeno ciwîyayîş û demê OHALî de zî mesajê huqûqî yê Tirkîya qedîya yo, sîstemê parlamenterî yê demokratîkî tasfîye bîyo, heq û azadî werte ra ameyê wedartiş. Şukrane wina vat: "Demo ke ma proses rê biewnê, ganî ma şêrê prosesê weçînayîşî yê 2015 û 7ê Hezîrane. Îqtîdar hemverê vînîkerdişê weçînayîşê 7ê hezîrane dima weçînayîş betal kerd û welat de bedelê giranî vejîyayî vernîya ma."

 

Çîyê ke OHALî de yenê ciwîyayîş

 

Şukrane dîyar kerd ke dimayê hewldayîşê darbeyê 15ê Temmuze dima 20ê Temmuze 2016ine de OHAL ameyo îlankerdiş û vat: "Bi OHALî dir pêro kerdişê demokratîkî xetimîyayî. 35 KHKyî ameyî weşanayîş. Bi nê KHKyan dir 130 hezar kesî zî kar ra ameyî eştiş. Tu prosesêkê huqûqî bi ca nêame û însanî ameyî îxrackerdiş. Bi xêrê OHALî dir mudaxaleyê grevan kerdî. Bi polîtîkayê dişminî nê prosesî dewam kerdî. Bi xususî bi seyan komeleyê ke seba cinî û tutan xebate kerdêne ameyî padayîş. Qeyûm tayînê şaredarîyan kerdî. Heqê şarî xesp kerdî. Îradeyê şarî xesp kerdî.  Şaredarî ameyî tepiştiş. Hemserekî ameyî tepiştiş. Xebatkarê çapemenîye ameyî tepiştiş."

 

‘Ma awankerdişê rejîmê yew camêrdî dî'

 

Şukrane vat, Bi maddeyê 35ine ê qanûnê hûmara 375 îxracî dewam kerdî û wina qal kerd:  “Bi OHALî dir şî referandûmê Desturê Bingehîn ê 2017ine. Bi tasfîyekerdişê sîstemê parlamenterîya ewro de prosesê awankerdişê rejîmê yew kesî vejîya vernîya ma. 20ê Temmuze de OHAL ame îlankerdiş û bi nê hêzî dir no rayîr wina ame awankerdiş. Ma welat de no proses dî û huqûq bi sîyasî. Qerarê huqûqî nînê dayîş, qerarê çarçewaya destûrê bingehîn de nînê dayîş. Ma sey KESKî nê prosesî de nobeta edeletî da destpêkerdiş.”

 

Hetê OHALî yê cinîyan

 

Şukrane dîyar kerd ke bi KHKyî dir xeylêk cinî ameyê îxrackerdiş û cinîyê ke ameyî tepiştiş bi OHALî dir prosesêkê giran ciwîyayî. Şukrane wina vat: "Ekonomîya cinîyan destê înan ra ameye girewtiş û mecbûr mendî reyna bi keyeyê xo dir biciwuyê. Şertê OHALî de cinîyan zor û zehmetîyê pîlî ciwîyayî. Hem hetê ekonomî, hem hetê psîkolojîk, hem hetê fîzîkî de prosesêkê giran ciwîyayî. La pêwa nê xoverdayîşê cinîyan vejîya vernî. Cinî bi qerar û hêz kuçeyan de bî."

 

‘Têkoşînê di hetî'

 

Şukrane vat di lingê têkoşînî estê û wina vat: “Linga yewine, têkoşînê huqûqî ya. Her çiqas huqûq biba sîyasî û qerarê sîyasî bigîrê zî ma do na linge heta peynî bixebitnê. Linga bîn zî awanbîyayîşê muxalefetê demokratîke ya û çarçewaya metodê demokrasî de caardişê polîtîkayê azadîwaştox û têduştî yo. Sey KESKî seba demo bêro de perspektîfê ma est o. Dem nê wezîfeyî dano serê ma. Ma bi têkoşînê di hetî eşkenê bikewê demo bêro."