Medya Uren

 

MERKEZÊ XEBERAN - Hemsereka KNKyî Zeynep Murad reaksîyon vera hêrişo ke hemverê turîstan de Zaxoyî de ame kerdiş, mojna û vat: "Ma pabebî bî. Tehlukeyêko pîl ê talankerdişê Kurdistan de est o. Eke ma reaksîyonêk pîl nêmojnê ra do qirkerdişî bêrê kerdiş û Kurdistanî zî talan bikerê. Ganî şar serewedaritişê xo bi çalekîyan sînordar nêverdo. Nika wextê yewîye yo, wextê serewedaritişê hemverê îqtîdarê Tirkîya yo."

 

Artêşa Tirke 20ê Temmuze de dewa Perexî ya bajarê Zaxoyî ya Mintiqaya Federe ya Kurdistanî topvaran kerd. Netîceyê topvaranî de 9 kes ame qetilkerdiş û 22 kesî zî birîndar bî. Bi hêrişî dir Kurdistan û xeylêk welatan de zî reaksîyonê pîlî ameyî ramojnayîş. Hemsereka  Kongreya Neteweyî ya Kurdistanî (KNK) Zeynep Murat derheqê hêrişê ke ameyê kerdiş û bêvengîya PDKyî de ajansê ma rê qisey kerd.

 

‘Ma heme pabeyê serebûtêk wina bî'

 

Zeyneb Murad hêrişê Zaxoyî ke serê cayê turîstan de ame kerdiş ercna û vat: "No hêriş newe nîyo û serebûtêk cîya nîyo. Bi serran o nê hêrişê wehşî serê herra Kurdistanî de yenê kerdiş. Dewleta Tirke bi çekanê tewir bi tewir hêrişê xo yê rojane, bi rayîrê hewayî û bejayî de kena. Bi xususî zî demê peyîn de xeylêk kesê ke mîyanê înan de cinî û tutî bîyî dinyaya xo bedilnayî. Demê hêrişê vernîya menga Nîsane de serê mintiqayanê Avaşîn, Zap û derûdorê ci de dest pêkerdî, ma sey KNK dest bi xebata xo hîra kerd. Ma bi partîyê sîyasî yê Kurdistanî û bi beşêk partîyê İraqî dir zî pêvînayîş kerd. Eynî wextî de bi sîyasetmerandan dir, roşnvîr û şarî dir zî têkilî dayî ro. Nê xebatê ma demêk derg o dewam kenê. Ma pabeyê serebûtêk wina bî. Ez bawer a ke her kes nê texmîn bikero. Demo ke hêriş det pêkerd, bername û polîtîkayê înan dîyar bî. Wa kes sey çîyêk ecêb pêşwazî nêkero. Çîyo muhîm vernîya qirkerdişî bi ca bêro, game eştiş o."

 

‘Bi hêrişêk dir wazenê serkewtiş bi dest bikerê'

 

Zeynebe pêvînayîşê serekkomarê Tirkîya Receb Tayib Erdoxanî yê bi welatê bînan dir kerdo ard vîr û vat: "Dimayê hêrişê serê Kurdistanî dest pêkerd pêvînayîşê mabêne dewletanê mintiqa, heyetê berzî yê Îranî, Rusya û hêzê cîya de kerd. Tifaqanê xo hîra kenê û nê dir hêrişanê xo hîra kenê. Dimayê pêvînayîşê ke keno, bi qirkerdişêk sey yê zaxoyî dir ma serxoşîya înan vînenê. Dewleta Tirke bi pêvînayîşê xo, bi hêrişê xo yê bêsînor amanc keno ke sînorê xo hîra bikerê. Bi xeyalanê xo yê sînorê mîsaqî millî wazenê kurdan çin bikerê. Seba resnayîşê amancê xo her rayîr û metodê şerî meşrû vînenê. Eke ma biwazê fam bikerê Tirkîya nê amancê xo bi eşkera ana ziwan. Her çiqas hêrişê ke kenê sey hemverê PKKyî ramojnenê zî rewşe wina sînordar nîya. Hêzo amancê înan rê tehluke awan keno PKK yo. Coka bi çinkerdişê PKKyî dir eşkeno bireso amancê xo. Bi hêrişêk dir wazeno çend serkewtişan bi dest bikero."

 

‘Xo ra biewnê û xo rexne bikerê'

 

Zeynebe dewam de wina vat: "Yeno zanayîş ke serê başûrê Kurdistanî û ser çar parçayan de hêrişê dewleta Tirkî bi ca yenê.  Başûr bi bedelê pîlî nê destkewtişî ameyî bidestkerdiş. Rojawan zî bi eynî rengî. Nika bombavarankerdişê turîstan alozîyê serê Kurdistanî û cesaretê Tirkîya ramojneno. Kam nê bingehî înan rê awan keno. Bê guman tena bi destê hêzê teberî ra nêame kerdiş. Yew sebebo sereyîn hemkarîya PDKyî yê bi Tirkîya dir o. No hêrişo peyîn ra xeylêk cayan de serwedaritişê şarî bi. Şarê ereb û kurdî vejîyayî meydanan. Bêguman reaksîyonê ke ameyê mojnayîş, xeylêk muhîm ê. Labelê lazim o ma vajê, ê xeylêk erey mendî.  Eke verê hewlestêk bimojnayîne Tirkîya rê, do no qirkerdiş nêameyîne kerdiş. Ganî ma polîtîkayê xo û îdarekarîya xo temaşe bikerê û lazim bikero rexne zî bikerê. Tena dewleta Tirke ney, hîn kesê ke bêvengî û hemkarîya înan zî kenê berpirsîyarê nê qirkerdişî yê."

 

'Her het dimayê berjewendîyanê xo yo'

 

Zeynebe vat ganî merdim proses baş bi ercno û vat: "Her hetî goreyê berjewendîyê xo têgêrenê. Nika krîzêko mîyanneteweyî est o û her kes fikrîyeno ke senî xo krîz ra bixelisno. Her yew înan do pare xo bigîro. Coka ma êdî bizanê ke Erdogan serê Kurdistan û Rojhelatê mîyanên de tersêk senîn virazneno. Şerê Lîbya û hêrişê serê Armenîyan de zî ma vîna ke Tirkîya rolêke senîn kay kerd. Seba berjewendîyê xo helwestêk senîn mojna. Wezîfe û berpirsyarîya ma hemine yo ke ma hemverê nê hişmendî de reaksîyonê xo ramojnê."

 

‘Çira PDKbêveng o?’

 

Zeynebe bombavaranê serê Zaxoyî ard vîr û vat: "Reaksîyonê hemverê hêrişê îqtîdarê Tirkîya wezîfeyê merdimayî yo. Coka lazim o rêveberîya Kurdistanê Federalî reaksîyonêko pîl ramojno. Labelê helwestê înan û bêvengîya înan ê na babete de ameya wina sewîya ke êdî ma şermezar bikerê. Reaksîyonê seb ake zeyîf manenê, nêbenê astengê hêrişan. Eke wina nêbîne dewleta Tirke hende rehet nêeşkayîne serê na herre de wina kay bikerdêne. Mîyanê mintiqa de 40 - 50  baregehê leşkerî yê tirkî estê. Îstixbaratê înan mîyanê ma de vila bîyo."

 

‘Ganî helwestê ma hîn babetan de yew bibo'

 

Zeynebe tewr peyîn wina vat: "Eke ma ferqê tehluke de yê, ganî wezîfeyê pawitişê herra xo zî ma heme pîya bigîrê serê kiftê xo. Her parçeyê Kurdistanî de lazim o teberê berjwendîyê xo yê partî û kesî têbigêrê. Eke lazim bikero, ganî ma heme zî no warî de bedelê pîlî bidê. Seba ke Tirkîya hemverê heme kurdan de ya. Ewro polîtîkayê başûrê Kurdistanî de yeno kerdiş, eynî wextî de serê rojawanê Kurdistanî û parçeyanê bînan de zî yeno kerdiş. Ganî ma kurdî bi hîsêko neteweyî xo û destkewtişanê xo bipawê. Eslê xo de no şer, şerê man û nemanê dewleta Tirkîya bi xo yo. Hemverê nê de yewbîyayîşê ma muhîm o. Bi xususî zî venga ma seba cinîyan o. Seba ke îqtîdaro bîyaye dişminîya cinîyan keno û ê rayîrî dir hêrişêko xususî keno."