Medya Uren

 

RIHA - Parlamentera HDPyî ya Riha Ayşe Surucuye derheqê hêrişê dewleta tirke yê serê Dewa Perexî ya Zaxoyî ya Mintiqaya Federe ya Kurdistanî de qisey kerd û bale ant serê helwestê PDKyî. Ayşe vat: "Demê referandûmî de sere de dewleta tirke hemverê xoserbîyayîşê Mintiqaya Federe ya Kurdistanî vejîya. Nê kerdişan de zî dîyar o  ke hemverê heme destkewtişê kurdan de dişminî kenê. Wa PDK xo nêxapêno û nêbo hemkarê qirkerdişê bînan."

 

Dewleta tirke vernîya çend rojan dewa Perexî ke girêdayê bajarê Zaxoyî yê Mintiqaya Federe ya Kurdistanî de bî, topvaran kerd. Netîceyê topvaranî de 9 kesî ameyî qetilkerdiş û 27 kesî zî birîndar bî. Derheqê babete de Parlamentera Partîya Demokratîke ya Şaran (HDP) Ayşe Surucu bi ajansê ma dir ercnayîşê xo pare kerd.

 

'Helwestê PDKyî cayê rexneyî yo'

 

Ayşe pêvînayîşê PDKyî yê bi Tirkîya û musteşarê MÎTî dir ard vîr û vat: "Dimayê pêvînayîşan hêrişêk xidar ê teberê sînorî ame destpêkerdiş. Helwestê PDKyî cayê rexneyî yo. A roje ra nata zî bombavaranê serê şarê kurdî û xozaya kurdan dewam keno. Hêrişî serê xeylêk wargehê kurdan yê sey, Mexmûr û Şengalî de ameyî kerdiş. Bi xususî bi hêrişê lêşin xeylêk welatijî dinyaya xo bedilnayî. Tesîrêk pîl zî serê cinî û tutan de kerd. Nimûneyê nê peyîn zî Zaxo de ame kerdiş. Hêrişêk serêcayê turîstan ame kerdiş û pêwa cinî û tutan 9 kesî dinyaya xo bedilna. Her çiqas dewleta tirke înkar bikero zî nê hêrişê serê sivîlan de ameyo kerdiş. Her ke şêro do bîlançoyê nê şerê lêşinî zî tewr zêde bibo."

 

'Bi çar destan hêrişê destkewtişê kurdan kenê'

 

Ayşe dewamê qiseykerdişê xo de dîyar kerd ke sîstemê AKP-MHPyî bi hawayêke akerde dişminî kurdan rê keno û vat: "Tirkîya bi çar destan hêrişê kurdan û Kurdistanî kena. Hetêk ra hewl dana sîyasetê demokratîkî yê vakurî tasfiye bikero. Bi qeyûman, bi tepiştişan û tecrîdî, bi pelçiqnayîşê cinîyan dir nê hêrişan hîra kena. Hetêk ra herra Rojawanê Kurdistanî binê îşxalkerdişê hêzê OSO, El Nusra û DAÎŞî de ya. Şarê Başûr demo ke hemverê nê îşxalkerdişî vejêno zî dewleta tirke hêrişê xo zêde kerd. Nika Başûr de zî bi eynî rengî bombavaran serê herra kurdan û wargehê sivîlan de ame kerdiş. Her het ra hêrişê destkewtişê kurdan kenê. Wazenê ke bi nameyê kurdbîyayîşî çîîyêk nêverdê. Ganî keyeyê Barzanî zî nê rastî bivîno û nêbo şirîkê nê qirkerdişî. Ganî xeta xîyanetî ra agêrê."

 

'Wazenê xeyalanê xo yê Mîsakî Mîlî bi ca bîyarê'

 

Ayşe vat, dewleta tirke seba qirkerdişan bikero, bahaneyan awan kena û vat: "Ma bahaneyê qetilkerdişê tutan û welatijan beno? PDK zî nê hêrişî sey ‘şerê mabêne 2 hêzan de’ bi name keno. No tena şerê mabêne PKK û Tirkîya de nîyo. Sîstemê AKPyî hemverê heme kurdan de hêrişêk dayo destpêkerdiş. Tirkîya hende hêzê xo çira Başûr de kom kerda? Uca de se kenê? Problemê înan tena PKK nîyo. Hemverê statuyê kurdan de hêrişêk o. Wazenê ke xeyelanê xo yê Mîsakî Mîlî bi ca bîyarê. Mîyanê na Tirkîyaya newe de qirkerdişê kurdan û çinhesibnayîşê kurdan est o. Lazim o tewr tay dimayê qirkerdişê Zaxoyî helwestê PDKyî no nêbîne. Prosesê referandûmî bîyarê vîrê xo. Sere de Tirkîya hemverê nê vejîya û qebûl nêkerd. Seba nêwazenê bi nameyê kurdan statuyêk bi ca bêro. PDK vano, problemê Tirkîya ma dir çin o. Wa no vîrê ma de bibo. Tewr asan zî nimûneyê Japonaya de akerdişê ziwanê kurdkî bi. Tirkîya ca de hemverê nê vejîya. No bi hawayêke akerde helwestê înan ramojneno."

 

'Ma pîya vajê êdî bes o'

 

Ayşe tewr peyîn zî çapemenîya terefdare nîşan kerd û vat: "Wazenê serê nê serebûtan padê. Ewro ma nê qirkerdişî zî sey qirkerdişê Roboskî bi name kenê. Eynî serebût qewimyeno, nika. Senîn ke o wext bêveng bî, nika zî bêvengîya xo pawenê. Başûr de bi desan dewî ameyî vengkerdiş û bi desan welatijî bî qurbanê nê hêrişan. Labelê veng kesî ra nêvejîya. Bombavarankerdişê cayê turîstan sewîyeya ke ma ameyê mojneno. Êdî vera ke biewnê nasnameyan ra qirkerdiş bi ca anê. Ma hemverê îqtidarêk nîjadperest, cinsperest û faşîstî de têkoşîn kenê. Ganî kurdî her ca de seba operesyonê Tirkîya reaksîyon ramojnê. Ganî ma êdî vejîyê meydanan û vajê êdî bes o. Lazim o îqtidarê AKPyî hêzê xo Başûrê Kurdistanî de biancê û fek operasyonan ra vera bidê. Sey partîya HDPyî ma roja yewin nêrazîbîyayîşê xo nîşan da û pêvînayîşê ma yê bi Başûrê Kurdistanî dir zî bi ca ameyî. Hemverê nê hêrişan çi lazim bikero zî ma amade yê."